MLA Lalrindika'n ramri vengtute a tlawh Assam aiin hmunhma an nei ṭha lo

Hachhek bialtu MLA Lalrindika Ralte chuan March 6, Inrinni khan Thinghlun khaw rama Mizoram ramri vênga awm police leh BSF sipaite a tlawh a, an dinhmun a enfiah. MLA leh amah ṭawiawmtute chuan, Mizoram ramri vengtute leh Assam ramri vengtute chuan awmna hmun an inneih ṭhat hleih hle tih an sawi.

Lalrindika Ralte chuan amah lo dawngsawngtu police leh Thinghlun khawtlang hruaitute hmaah thu sawiin, "Intihmualpho emaw, indem emaw tuma he hmuna rawn kal ka ni lo. Ram leh hnam tana thawkho tur kan ni. Ram leh hnam tan ramrî-ah police-te in awm a, in beisei angin ngaihtuah in ni lo mai thei, mahse, ram leh hnam tana inpe in ni tih hre reng ang che u. Vui lo turin ka duh che u a ni," a ti.

Rinawm taka ram leh hnam tana awm a ṭhat thu sawiin Lalrindika chuan, "Mizo kan ni a, kan ram leh hnam tana ti vek kan ni. Tu mah dem tur an awm lo a, theih dan danin ram leh hnam tan theihtawp chhuah tur kan ni. Langkaih Group MUP-in in hmunhma atan thawh khawma hmalak an rêl a, mahse, sorkar ngaichâng rih turin kan ti a ni," a ti a; harsatna an neih chuan amah be hreh lo turin police-te a chah.

Hachhek Bialtu MLA chuan, mi dem vak vak ringawt tur a nih loh thu sawiin, "Ram leh hnam tana rawngbawl tur kan ni. In awmna hmun tur siamṭhatna atan ban khur laih har a ni tawh lo turah ngai ang," a ti.

MLA ṭawiawmtu Hachhek Group YMA hruaitute chuan, October 2020-a an hmalakna tih loh chu Mizo IR-te awmna hmunah hmasawnna àwm an hmuh loh thu sawiin, "Ram venghimtute awmna hi fûrpui thlen hmaa sak ṭhat ngei a ngai kan ti a. Fûrpuiah ram venghimtute heti ngawta awmtir chu ṭha kan ti lo," an ti a; ram venghimtute tan pawisa nei lo mah se, tha sên an inhuam reng thu an sawi.

Thinghlun khawtlang hruaitute sawi danin, Thinghlun rama Mizo IR-te awmna hmun ram neitute'n sorkar hnaah an fate a ngheta thun an nih chuan a thlàwnin ram an pe phal a, mahse, sorkar aṭangin thu hmuh a la awm lo. Ram neitu pakhat zawk fa chu SSA hnuaia thawk lai a ni.

Sorkar laipuiin ramri venghim tura Mizoram sorkar hnena a pek BSF-te chu Thinghlun Middle School-ah awmtir ṭhin an ni a, sikul ṭan hnuah hall-ah dah an ni. BSF-te hi Mizo IR-te awmna bul lawkah an awm a, an awmna hmunah darkar 6 zelin mi 13 an in duty chhâwk ṭhin. Duty post leh ruah a sûr thulha awm hulna tur hmun an nei lo.

Hetih lai hian, sorkar laipuiin ramri venghim tura Assam lama a dah SSB-te chu awmna hmun ṭha tak siamsak an ni thung.