Commerce & Industries Minister-in Sumdawnna hmun tur a enfiah

Commerce & Indus­tries minister Dr R Lal­thangliana chuan March 6, Inrinni khan Lawngtlai district-a Mizoram ramri dep, Zochachhuah bula Zorinpuia India leh Myanmar insumdawn tawnna tur Land Custom Station (LCS) sakna hmun tur a tlawh a, hmalak dan tur a enfiah.

Dr R Lalthangliana chuan, ram hmasawn nan ram dang nena insum­dawn tawnna a pawimawh hle tih sawiin, "Remna thuthlunga chuang a nih avangin international border-a sumdawnna hmun din hi sorkarin a ngai pawimawh hle. India sorkar aiawhte sawi danin, Kawrpuichhuaha trade centre phei chu kum 2023 August thla velah kalpui ṭan (commission) hman beisei a ni," a ti.

Commerce & Industries hnuaiah Myanmar leh Bangladesh nena ramri hmun hrang hranga in­sumdawn tawnna tur changtlung taka din turin hma lak mek a nih thu sawiin Minister chuan, "Zorinpui, Saisih­chhuah, Hruitezawl, Kawr­­pui­chhuah, Silsury, Thing­sai leh Zokhaw­tharahte border trade hmun atan hmalak mek a ni," a ti a; hmun hrang hrangah border haat din turin ruahmanna siam mek a nih thu a sawi. 

Zorinpui LCS hmun atana C&I department-in ram bigha 67.32-a zau a neih tawh chu kawng kal dan tur tihdanglam a nih avangin sût a ni a, a tharin ram bigha 85 (11.3850 hectare)-a zau Lai Autonomous District Council (LADC) chuan Mizoram sorkar a pe leh a ni. Minister-in a tlawhnaah hian LADC  executive member Hre Kung chuan land lease copy a hlan nghal.

LADC Revenue department-in Mizoram sorkar hnena LCS hmun tur a pek hi Zochachhuah ram chhung, Myanmar ramri lui bul, KMMTTP kawngpui bul a ni a, kum 99 chhung atan an pe a; grade-B niin, bigha 85 (hectare 11.3850)-a zau a ni.

NBCC (consultant) chuan Zorinpui LCS sakna turin cheng vbc. 54 hû detailed project report (DPR) siamin, sorkar laipuiah thehluh a ni tawh a; a puitlin hma atan Zorinpuiah hian temporary immigration checkpost kalpui tum niin, a hmunhma tur enfel a ni tawh.

Dr R Lalthangliana chuan, insum­dawn tawnna tichangtlung turin inkalpawhna kawngpui ṭha a pawimawh thu a sawi a, "Kawng sial mek a ni a, project lian ber KMMTTP kawngpui sial mek pawh Zorinpui thleng zawh thawkhat tawh niin, Zorinpui aṭanga Paletwa pawh turin chak taka thawh mek a ni. Saisihchhuah kaltlanga Myanmar nena insumdawn tawnna kawngpui sialna tur pawh sanction a ni tawh," a ti.

Commerce & Industries Minister hian Myanmar ram chhunga Paletwa thleng pawh tur kawngpui sial mek chu km. 4 thleng zawhin a enfiah a; hna thawktute thawh chin leh harsatnate sawipuiin, a hma thei ang bera hna zawh tum turin a chah.

Zorinpui aṭanga Myanmar ram chhung, Paletwa thlenga KMMTTP kawngpui sial tur chu km. 109.200-a thui tur niin, double lane-a siam tur a ni a; Ministry of External Affairs enkawlna hnuaiah Engineering Projects (India) leh C&C Construction-te'n an thawk mek.

Zorinpui-Paletwa kawngpui hian Myanmar rama khaw 24 a tan tlang dawn a, a pumpuiin km. 109.200 aṭangin a hmun sâm fai tawh chin chu km. 95 a ni a; design ruahman tawh km. 45, lei laih chin km. 38 leh lirtheiin a zawh theih tura subgrade phah tawh km. 14.860 a awm a ni.

Minister hi Aizawl aṭangin C&I Development Board vice chairman C Ramhluna leh secretary P Jawahar ten an ṭawiawm a; Lawngtlai aṭangin LADC hotute'n chief executive member Manghmung Chinzah hoin an ṭawiawm a, bawrhsap Dr Andrew H Vanlaldika'n a ṭawiawm bawk.