COVID-19: Mizoram dinhmun Ni 2 chhungin hripui vei hmu lo

March 5-6, ni hnih chhung khan Mizorama swab sample 1,356 endik zingah Covid-19 vei hmuh chhuah a ni lo a, Inrinni leh nimin khan hripui laka fihlim tawh mi paruk chhuahtir an ni. March 4, 2021 khan ZMC-a enkawl lai pakhat a thi a, Covid-19 vei thia chhiar a ni lo.

Inrinnia hripui laka fihlim tawh mi panga chhuah­tirte chu SRH-ZMC aṭanga chhuak an ni a, Aizawl district-a mi pali leh Saitual district-a mi pakhat an ni. Nimin khan Champhai CCC aṭangin mi pakhat chhuahtir a ni bawk. 

March 4, Ningani khan Covid-19 vei vanga SRH-ZMC ICU Exten­sion-a enkawl lai Albert Laltlansanga, Mission Vengthlang chu a thi. Thu dawn danin, Albert Laltlansanga hi private hospital-a a awm laiin Covid-19 positive a ni tih hmuh chhuah a ni a, SRH-ZMC-ah lak nghal a ni. ICU-ah enkawl ṭhin ni mah se, a swab sample endik nawnnaah a negative avangin ICU aṭangin March 3 khan ICU Extension-ah sawn a ni a; Covid-19 vei thi zingah chhiar a ni lo. 

Mizoramah Covid-19 vei thi mi 10 awm tawh zingah, January 10, 2021 chawhnua SRH-ZMC-a thi Lakhi Dhan Chakma (57) Silsury, Mamit dis­trict chu January 5-ah a negative tawh tih hmuh a ni a, February 15 zing dar 6-a SRH-ZMC vêka thi T Pazawna (82), Ramhlun North pawh a thih hma ni thumna velah a negative tawh tih hmuh a ni bawk. An pahnih hian Covid-19 vanga thi anga chhinchhiah ve ve an ni. 

March 5, Zirtawpni khan ZMC laboratory-ah swab sample 37, TrueNAT-PCR hmangin Kolasib leh Mamitah sample 15 leh RAT hmangin district parukah sample 661 endik a ni a; a vaiin sample 713 a ni. Inrinni khan ZMC-ah sample 30, TrueNAT-PCR hmangin Champhai leh Lawngtlaiah sample 14 leh RAT hmangin district pasarihah sample 599 endik a ni a, a vaiin sample 643 a ni.

Mizoramah Covid-19 vei mi 4,428 hmuh chhuah a ni tawh a, mipa 3,230 leh hmeichhia 1,198 an ni. Nimin tlai dar 5 thleng khan mi 4,410 (99.59%) chhuahtir an ni tawh a, mi 10 (0.22%) thi tawhin, enkawl mek mi pariat (0.19%) an awm.

March 6, 2021 thlenga Mizorama swab sample endik tawh zat chu 2,37,690 a ni a, chu'ng aṭanga Covid-19 positive hmuh tawh zat 4,428 chu 1.86% a ni. Hripui vei hmuh tawh zinga mi 2,112 chu Mizoram chhunga kái chhâwng an ni a, mi 2,316 chu Mizoram páwn aṭanga an rawn luh hnua hmuh chhuah an ni thung.

Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a, chumi hnua hmuh chhuah leh hmasak ber chu June 1, 2020-ah niin, ZMC laboratory-ah hmuh chhuah a ni.

ZMC-ah hian Covid-19 positive 2,653 hmuh chhuah a ni tawh a, TrueNAT-PCR hmangin 673 leh RAT hmangin 1,101 hmuh chhuah a ni tawh.

Tun dinhmunah Mizorama hripui vei enkawl mekte chu civil mi vek an ni a; district 11 zinga pasarih - Lunglei, Siaha, Kolasib, Serchhip, Lawngtlai, Khawzawl leh Hnahthial district-ahte Covid-19 vei an awm tawh rih lo.