Myanmar aṭanga ráltlân an awma Inrin dan tur DC-te'n an ngaihven

Myanmar sorkar paihthlaa sipaite'n thuneihna an chhuhsak avanga Myanmar rama buaina chhuak mek avangin Mizorama rawn tlanchhe lut an awm tawh a; rawn luh belh zel thei an nih avangin Mizoram sorkara district thuneitute leh khaw ṭhenkhat chuan ráltlànte dawnsawn dan tur an buaipui.

Serchhip DC Kumar Abhishek chuan March 6, Inrinni khan India leh Myanmar inrìna hnaiha awm Sailulak khua a tlawh a, Myanmar aṭanga raltlan lut an awma hmalak dan tur a enfiah.

Kumar Abhishek chuan, raltlan rawn lut an awm a nih chuan, an thla laksak a, social media-a pho lang lo turin mipui a chah a, "BDO hrilh vat tur a ni a, damdawi lama mithiamte nen inráwnin, hripui lakah an him em tih endik hmasak tur a ni," a ti a; raltlan an awm a nih pawha an awmna atan Zakapa Hall buatsaih tur a nih thu a sawi.

Tun dinhmunah sorkar laipui aṭangin inkaihhruaina mumal a la awm loh thu sawiin Serchhip DC chuan, "Raltlan an awm a nih chuan mikhual thlena lo thlen phawt a ngai a ni," a ti.

Lawngtlai DC Dr Andrew H Vanlaldika chuan Myanmar aṭanga raltlante dawnsawn dan turah thuchhuah a siam a; politics emaw, pawl thil emawa an inhnamhnawih avanga an nunna derthâwngte chauh ráltlâna chhiar tur a nih thu a tarlang.

DC thuchhuah tarlan danin, Myanmar aṭanga rawn lut an awm chuan a rang thei ang berin VC-te'n an bialtu BDO-ah emaw, DC pisaah emaw an hriattir tur a ni a, an luhna khaw hmasa bera VC leh tlawmngai pawlte'n lo finfiah tur a ni. Finfiahna tur form chu BDO/DC pisaah lak theih a ni.

Raltlante chu an hriselna leh Covid-19 an vei leh vei loh endik tur a ni a, The Mizoram Relief & Rehabilitation (of Refugees/Internally Displaced Persons) Scheme, 2018-in a sawi angin lo tuamhlawma chhawmdawl tur a ni. Felfai takin register-ah chhinchhiah tur a ni a, an nihna tichiang thei turin DC office aṭangin identity card siamsak tur a ni. Raltlante chu an awmna khua pêlin khua/district/state dangah an insawn phal a ni lo.

Hetih lai hian, Ngharchhip VC leh YMA chuan thuchhuah siamin, Myanmar buaina avanga sahimna zawnga Mizorama lut, Ngharchhip pan an awm a nih chuan inhawng taka an lo lawm tur thu an tarlang a, "An mamawh chenna tur in, ei tur, tui leh electric êng thlengin kan theih tâwkin kan ngaihtuahsak ang," an ti.