MZP-in Zoram Ni an hmang

Mizo Zirlai Pawl Gen. Hqrs chuan March 5, 2021 zan khan Ignite Studio-ah Zoram Ni an hmang. Zoram Ni hi March 5,1966-a India sorkarin jet fighter hmanga Mizoram a bomb champha hriat rengna atana hman a ni.

MZP president B Vanlaltana chuan, Zoram Ni hman chhan Mizote'n an hriat chian a ṭul thu sawiin, "Kum 1966-ah India sorkarin ram dangah pawh la thleng ngai lo jet fighter hmangin Mizoram a bei a, nunna chánte leh ram tui lei loa awm mi tam tak an awm phah. Zo fate kan awm chhung chuan he ní hi hriat reng a ni tawh ang," a ti a; Zoram Ni chuan ṭhangtharteah hnam tana inpek tharna leh hmasawnna thlen se an duh thu a sawi.

Vanlaltana chuan, khawvel hmun hrang hrangah Zo fate an awm thu sawiin, "Mizoramin zalenna a sual lai khan hnam pasalṭhate Myanmar leh Bangladesh-ahte an kalin an lo tuamhlâwm ṭhin. Vawiina kan unau Myanmar ram buai avanga harsatna tâwk mekte hi Zoram mipui hian kan enliam mai tur a ni lo. Sorkar beráwn chungin MZP chuan a ṭul angin hma a la zel dawn a ni," a ti.