IGNOU Aizawl in sakna tur lungphûm

March 6, Inrinni khan sorkar laipuia Education minister Dr Ramesh Pokhriyal ‘Nishank' chuan online hmangin Selesihah IGNOU Regional Centre, Aizawl building sakna tur lungphùm a phúm.

Dr Ramesh Pokhriyal chuan, IGNOU chu khawvela distance education lian ber a nih thu sawiin, "IGNOU hi NAAC (UGC)-in university ṭha a tehnaah A++ a pek a ni a, mi tam takin hlawhtlinna an hmu tawh a ni," a ti a; Mizoram bikah pawh state chhung mite eizawnna mila hman ṭangkai a nih thu a sawi.

IGNOU vice chancellor Prof. Nageshwar Rao chuan, IGNOU chu India rama university ṭha tehfunga a sang ber hmu pha 13 vel zingah a tel thu leh, IGNOU Regional Centre, Aizawl chu hmarchhak state zinga mahnia in nei thei tur pahnihna a nih thu a sawi a; IGNOU zirlaite harsatna sutkianna turin a bikin portal hran ‘igram’ siam a nih thu leh zirlaite'n hmang ṭangkai se a duh thu a sawi bawk.

Hawnna inkhawma tarlan danin, India ramah IGNOU regional centre 56 a awm a, Regional Centre, Aizawl hnuaiah kum 2020 khan zirlai 3,894 an inziak lut a ni.