Lunglei MJA inbuatsaih dan thlirho

MJA General Headquarters hruaitute chuan an president Zonunsanga Khiangte hoin March 6, Inrinni khan MJA, Lunglei district an tlawh a, Lunglei MJA hruaitute nen Lunglei Press Club-ah inkâwmin, kumina Lungleia MJA General conference neih tur atana inbuatsaihna an thlirho.

Lunglei MJA president H Lalthansanga chuan, MJA General Conference, 2021 thleng turin inbuatsaihna an peih thawkhat tawh thu a sawi a; conference budget atan Rs. 6,00,700 ruahman chu mi dang pûr buai ngai loin Lunglei MJA-in an intodelh theih an beisei thu a sawi a ni.

MJA president Zonunsanga Khiangte chuan, Lunglei MJA-te inbuatsaihna chu lawmawm a tih thu sawiin, "MJA-te hi journalist kan ni a, member kan nih chhan ang takin kan hna a pawimawh. Covid-19 léng avang leh lockdown vel avangin chanchinbu kan khaihlak nasa a, boruakte a ziaawm ta zel a, ṭan kan lâk thar a ṭul," a ti a; chanchinbu la tichhuak thei chiah lote pawh a hmá lama tichhuak tur leh ṭan la thar ṭheuh turin a fuih.

MJA General Headquarters aṭanga kalte hi President bakah, treasurer C Lalhmachhuana leh Library Committee secretary Lalrammawia te an ni.