United for Democratic Myanmar-in Mizoram BJP-ah ngenna an thlen

United for Democratic Myanmar, Mizoram hruaitute chuan March 6, Inrinni khan Myanmar ram buaina chungchangah BJP, Mizoram president Vanlalhmuaka an kâwm a; Myanmar buaina avanga Zo hnahthlakte bakah, democracy duh vanga buaina tâwkte'n Mizoramah sa himna an neih theih nan sorkar laipuia hmalakpui tura ngenna lehkha an thehlut.

Vanlalhmuaka chuan, a rang thei ang bera hma a lak tur thu sawiin, "Zo hnahthlak unau Myanmar ramah chêng tam tak an awm a, tunah sipai thuneitute'n democracy pawngsual a, mipui zalenna an rahbehsak avanga nunna chán tam tak an awm hi a pawi tak zet. An sa himna tura India rama rawn tlân luh ngai an awm a nih chuan him taka an awm theih nan a ṭul ang zelin hma kan la ang," a ti.

BJP, Mizoram thuchhuah tarlan danin, United for Democratic Myanmar, Mizoram lehkha thehluh chu BJP, National president JP Nadda hnenah an hriattir nghal a ni.