MLA fáng vek tur kan ni - Tlansanga

Serchhip bial MLA by-election-a Congress party candidate tur PC Laltlansanga chuan March 6, Inrinni khan Thenzawla an party inkhawmah thu sawiin, by-election-ah tu pawh tling se, MLA fáng an nih dawn thu a sawi.

PC Laltlansanga chuan, MNF sorkarin MLA an ngah rih tih sawiin, "MLA pakhat neih belh an mamawh lo.

Mizoramin oppositon MLA kan mamawh. Khawi party aṭang pawhin tu pawh tling se, MLA fang vek kan ni dawn. Ruling party candidate pawh thlan tlin ni se, minister post a khat vek tawh a, kan innghahna tur chu MLA fund tho vek a ni. Khawi MLA bial mah hi opposition bial an nih avanga hlamchhiah an awm ngai lo a, hmasawnna hi a kal ngaiin a kal vek a ni," a ti.

PC Laltlansanga chuan, kum 2023-ah MLA inthlanpui a awm leh mai dawn thu sawiin, "MNF hian an term chanve dáwn an hman hnu hian ram rotling tur hmasawnna an thawh mipuiin an hmu lo. Kan hotute sum hnutchhiah an hman zawh hnuah sorkar sum harsatnain a nang zui a ni," a ti a; Pathian leh mipui zarah Congress party-in hma an sawn zel niin a sawi.

Chief minister Zoramthanga'n tun hnaia Thenzawl leh Serchhip a tlawh ṭumin, bial hmasawnna tur a sawi lo nia sawiin PC Laltlansanga chuan, "Mipuite sum tamzia hlir a sawi khum a, a takah sum a awm si lo. 'Khawi veng emawin an nuihzat mai ang che u' tih sawi tur mai mai chuan CM hi lo kal tawh suh se," a ti.