KHAWTHLIR

Zoram Medical College (ZMC) Governing Council chu nimin khan chief minister Zoramthanga hoin CMO conference hall-ah an ṭhukhawm a, ZMC inkaihhruaina by-law siamṭhat ngaite an enho bakah, ZMC tihchangtlunna tura ram zauhna tur chungchang an sawiho. He hunah hian Health minister Dr R Lalthangliana, Health & Family Welfare Board vice chairman Dr ZR Thiamsanga, MLA Prof. F Lalnunmawia, chief secretary Lalnunmawia Chuaungo leh member dangte an tel.

Cooperation minister C Lalrinsanga chuan ZPM member VL Zaithanzama zawhna chhangin, Mizoram Cooperative Socities Rules, 2012-in a phût, Cooperative Development Council chu Mizoram sorkarin a la din loh thu nimin khan Assembly House a hrilh a, "Tunah hian din tura hmalak mek a ni," a ti.

Mizo Upa Pawl (MUP), Lunglei chuan nimin khan Lunglei Convention Centre-ah Assembly vawi 46-na an hmang a, Science & Technology chief scientific officer Dr RK Lallianthanga'n a hmanpui. RK Lallianthanga chuan, Lunglei MUP member 30-te tan Berawtlang, Aizawl­a Science Centre fan theihna tur buatsaih a nih dawn thu a sawi. Lunglei MUP-ah hian unit 133 leh member 10,076 an awm a, nikum leh kumin chhungin member 329 an thih laiin, kum 100 tling mi pasarih an awm a ni.

Serchhip District Task Force on Mahila Shakti Kendra chu nimin khan DC pisaah additional DC Chuau­hnuna kaihhruaiin an ṭhukhawm a, Swachhta Pakhwada (Cleanliness fortnight) 2020 hman dan tur an rêl. Swatchhta Pakhwada hi March 1-15, 2020 chhunga hman tura ruahman a ni. Meeting chuan, sorkar department pisa zawng zawngah thawktute chhiar theih turin Swachh Bharat Mission pledge sem chhuah ni se, an ti a; faina hnatlang leh office hnathawkte'n faina chungchanga sawi duh an neihte sawi hona nei turin department zawng zawng ngente an rel.