KHAWTHLIR

Vawiin chawhma dar 10:30 aṭang hian 8th. Mizoram Legislative Assembly session vawi thumna ṭan a ni dawn a, June 27, 2019 thleng a awh ang. Vawiin hian session hnuhnung ber leh tun ṭum session inkara MLA thite sûnna hun hman a ni dawn a, naktukah Finance changtu chief minister Zoramthanga'n kum 2019-2020 atana budget puitling a pharh ang. June 17-26 (June 21 tel loin) chhung zawng chu zawhna leh chhanna hun hman zawhah demand sawihoa pass tum a ni dawn. June 21-ah chuan zawhna leh chhanna hman zawhah private member resolution lut a awm chuan sawiho a ni dawn a; session tawp ní June 27-ah chuan zawhna leh chhanna hun hman zawhah sorkar thil pawimawh ngaihtuah tur a awm chuan an ngaihtuah dawn a ni.

Thingsul Tlangnuam Branch YMA chuan YMA Day lo thleng tur pualin nimin khan an khuaah blood donation camp an huaihawt a, Aizawl Civil Hospital tan mipa 40 leh hmei-chhia pangate'n thisen unit 45 an pe.

St. Paul’s Higher Secondary School chuan June 11, Thawhṭanni khan an auditorium-ah kumin HSLC leh HSSLC-a an sikul ṭanga top ten-a langte leh subject topper-te chawimawina, Proficiency Award an sem a, Planning secretary Dr C Vanlalramsanga khuallian a ni. Khuallianin thu a sawi bakah, Paulians’ Alumni Association president Vanlalduhsaka leh executive member Dr Vanlalthlana, MLA ten thu an sawi.

Aizawl District Level Coordination Committee for 7th. Economic Census 2019 chu nimin khan district bawrhsap Vanlalngaihsaka hoin DC conference hall-ah an ṭhu a, Economic Chhiarpui vawi 7-na, kumina neih tura inpuahchahnate an thlirho. DC chuan, Economic Census pawimawhna sawiin, "District pum huapa hmalakna tura sorkar project hrang hrang siamna atana hman tur data chhawp chhuahna tur te, district chhunga sorkar hmalakna tura sum luan luh dan turte leh hamṭhatna sem dan tur chenin a hril dawn a ni," a ti.