Champhai zirlaite an lungawi lo

MZP headquartes, Champhai hruaitute leh Champhai College Students Union hruaitute nimina ṭhukhawm chuan, Champhai College-a zirtirtu pa­hnih, thlaktu awm loa sawn chhuah an nih avangin lungawi lohna lantir an rél.

Meeting hi Champhai MZP president H Lalramhluna'n a kaihruai a ni. Meeting chuan, Champhai College-a zirtirtu indaih lohna hnawhkhat tura sorkar an ngen laia history zirtirtu pahnih, thlaktu awm loa tun hnaia sawn chhuah an ni chu hriat­thiam har an tih thu an tarlang a, "Subject hrang hranga zirtirtu post ruakte hi session thar, July 1, 2019 hma ngeia hnawhkhat tur­in kan ngen a, history phei chu a tlem berah pahnih min pe turin kan ngen. Kan ngennate min tihhlawhtlinsak loh chuan Champhaia zirlaite'n ke kan pên dawn a ni," an ti.

Champhai MZP leh Champhai College SU-te ruahman dan chu - July 1, 2019-ah badge dum bela college kal a, July 2 aṭangin Champhaia zirna-in, bank leh sorkar pisa zawng zawng khârte a ni.