Ṭhalaite tiphur tura hmalak Sorkarin a ngai pawimawh - Chief Minister

Chief Minister chuan scouts & guides tana activity buatsaih bakah NSS, NCC leh infiamna lamahte activity hrang hrang ruahman chhoh zel a nih thu sawiin, "Ṭhalaite tiphur tura hmalak chu sorkarin a ngaihpawimawh zing a mi a ni. A remchan dan ang zelin state chhung mai ni lo India hmarchhak state leh ram pum huap thlenga Mizoramin a thlen theih dan ngaihtuah a ni dawn," a ti. Zoramthanga chuan scouts leh guides te chu an rally  aṭangin inunauna leh inhriatthiam tawnna te an zirchhuah a, an upat hun thleng pawha a ṭha zawnga an nun tidanglamtu a lo nih ngei a duhsak thu sawiin, zu leh ruihhlo laka fihlim turin a chah. Hun kal zelah harsatnate pawh tawk mah ila tumruhna nen engkim an hneh theih tih sawiin Zoramthanga chuan, "Kan din­hmun thlak thei lo mah ila keimahni kan inthlak thei a ni," a ti. Khualzahawm Sports & Youth Services minister Robert Romawia chuan scouts & guides te tan state pum huapa rally neih chu thil hlawkthlak tak nia a hriat thu sawiin, "Tun hun mai bakah nakin thlenga nun tana ṭangkai tur thiam thil, life skills zirchhuahna ṭangkai tak a ni. Chin ṭha lo, social evils laka invenna leh fihlim tura invenna ṭha tak a ni," a ti a, rally chu neih chhunzawm zel a nih a beisei thu a sawi. Ṭhalaite hmasawnna lamah sorkarin nasa taka hmalak a tum thu sawiin Robert Romawia chuan, "Scouts & guides activity tam zawk neih bakah pawl dangahte pawh zau zawka hmalak zel tum a ni. NCC battalion thar Lunglei a siam pawh office luah theih ṭep a ni," a ti. Mizoram Bharat Scouts & Guides 14th State Rally 2020 ah hian district zawng zawng  aṭangin an tel kim a, thil chi hrang hrang  - march past, folk dance, quiz, pioneering project, food plaza, pageant show, painting competition leh adventure activities-ahte an inel a ni.