Brandisii hi a sîng téla phun theih tur kan hmuh awmchhun a ni - CM
Chief minister Zoramthanga, Horticulture department enkawltu chuan, Mizorama rua chìn an tumah Brandisii chu a sîng téla phun theih tur an hmuh awmchhun a nih thu leh, raw chìnna tur ram vah manah Rs. 10,000 zel leh mangkhawh nan Rs. 2,500 zel sorkarin a pek thu Assembly House a hrilh.
CM Zoramthanga hian March 3, Thawhlehni zana Assembly session-a a demand sawihona a khaikhawmnaah, "Tuna kan hmuh chinah chuan Brandisii hi a sîng téla produce-a phun theih tura hardening han tih theih tur kan hmuh awmchhun a ni," a ti a; Brandisii chu an kalna tur leh an lungawina tur a nih thu a sawi.
Raw enchhinna atan a chíng tura thlan khaw mipuite'n lo an vah manah ram hectare khat (ṭin hnih leh a chanve) hmunah Rs. 10,000 zel pek a nih thu sawiin Zorama chuan, "Mangkhawhna manah Rs. 2,500 kan pe. A chi manah hectare khatah chuan a tlangpui thuin a chi 400 a ngai. Hei hi chu kan la lei lo a, a phun theihna hmasa ber tur pawh May thla tawp vel a ni," a ti.
Zoramthanga chuan, a enchhin nan in 200 chuang vel tih chhin a ni tih sawiin, "An hnathawh ang zela pawisa pek a, a taka thawk chauh pek kan tum. A hranpaa pawisa pek a, an duh anga hman theihna tura tih ngawt kan awih lo," a ti a; a taka thawk chhuak ngei tura thawk, an ringthar enpui a, an tuh ngei, an thlo ngei tih an hriatte chauh pawisa pek tur a nih thu a sawi.
Chief Minister chuan, mau/ruate chu Forest department hnuaiah awm ṭhin mah se, India sorkarin Horticulture hnuaia a dah avangin state-te pawh dah tura an tih angin Mizoram sorkar pawhin Horticulture department hnuaiah a dah tih a sawi a; mau/rua chungchang chu an hre bik lo tih sawiin, "Kan dap chawp a, a lo dik lo a, hei hi a ṭha zawk e kan ti a, a tih pawh kan tisual tam khawp," a ti.
Zoramthanga sawi danin, kum 2005/2006 velah Delhi-a World Bamboo Congress, khawvela mau/rua lam thiamte punkhawmnaah tissue culture-a rua siam thiam an awm leh awm loh a zawt a, chuta an kawhhmuh ber chu Belgium rama company pakhat a ni. Belgium ram company hotute nen an inhmu a, mahse, bamboo tissue culture tih tlak an la thiam loh thu an sawi.
Chief minister Zoramthanga chuan, mau/rua chungchangah tun hmain a beidawng hman tih sawiin, "Kan sorkar hmasak pawh khan khatiang khan hun kan hmang zo ṭhak a ni. A vah pawh ka vâk, a zawh pawh ka zawt nasa. Mahse, World Bamboo Congress-ah meuh pawh khan min kawhhmuh tur an hre lo," a ti.
Brandisii chu Burma-a mi lâk a ni tih sawiin Zorama chuan, "Kum 100 chuang kal taah khan British-in ṭha an ti em a, a bulin an kar ni âwm a ni," a ti a; Brandisii chu British hoin South India-ah an phun a, chuta
ṭanga kal zel chu mithiam pakhatin tissue culture-in a tipung a, chu chu laboratory-a a tihṭiahte leh an phunna hmunah an en a, a ṭhat hle thu a sawi.
Opposition group leader Lalduhoma'n Brandisii awm dan a sawi chungchangah Zoramthanga chuan, a ziaktute'n an hre fuh lo deuh nia a lan thu a sawi a, "A ṭang te, a zárte a lian a, a sak a tih kha a ni hauh lo. A ding ngíl ṭhulh mai a, rawnàl lian tak a ang deuh berin ka hria. Han sah nikhua pawha a hnawk buaithlak tur a awm hauh lo," a ti.
Brandisii chu Latiflorus nen a inang viau tih sawiin, "Latiflorus-te phei chu Sihphira kan huanah a awm a, a duh apiangin han en ula. A ṭang hnawk mi tibuai chi a awm lo hrim hrim. Kei pawhin ka sât tam em em mai a, a hahdamthlak a, a len pawh an lian ṭha thawkhat a, teh kuala inchi 15-20 inkar an ni deuh ber," a ti a; Brandisii pawh South India-a an chìnna hmunah Horticulture department hotute kal nawnin an enfiah nawn thu a sawi.