Assembly budget session ṭan a ni Vawiinah budget pharh a ni dawn

Mizoram Legislative Assembly pariatna session vawi thumna, budget session ni bawk chu nimin khan ṭan a ni a, June 27, 2019 thleng a awh ang. Vawiinah Finance department changtu chief minister Zoramthanga'n kum 2019-20 chhunga Mizoram budget a pharh ang.

Assembly session hi speaker Lalrinliana Sailo kaihhruainain chawhma dar 10:30-ah ṭan a ni a; session hnuhnung ber leh tun session inkara Assembly leh Parliament member thi mi pahnih - Union Defence minister hlui, Goa chief minister a nih laia thi Manohan Parrikar leh Mizoram Assembly speaker hlui R Lalawia te sûnna hun hman a ni.

House leader Zoramthanga'n Manohan Parrikar leh R Lalawia te chanchin a sawi a; ZPM Legislature Party leader Lalduhoma, Congress Legislature Party leader Zodintluanga, BJP MLA Dr BD Chakma, INC member KT Rokhaw, MNF member Lalchamliana leh MNF member Dr ZR Thiamsanga ten uina thu an sawi hnuah sûn nan minute khat chhung ngawi rengin an ding.

December 13, 1955-a Mapusa, Goa-a piang Manohan Parrikar hi kum 1994-ah a vawi khat nan BJP ticket-in MLA atan thlan tlin a ni a, a hnuah ṭum li dang MLA-ah tling zuiin, ṭum li chu chief minister a ni. November 8, 2014-ah chief minister nihna bànsanin, Union Defence minister a ni a, chumi hnuah Union minister aṭanga bángin, March 14, 2017 aṭangin Goa Chief Minister a ni leh a ni.

Manohan Parrikar hian pancreatic cancer a nei tih September 2018-ah hmuh chhuah a ni a, AIIMS, New Delhi leh USA-ahte enkawl a nih hnuah, March 17, 2019-ah a thi. R Lalawia hi August 21, 1941-ah Sialhawk khuaah a piang a, kum 1984-ah Mizoram union territory-ah a ṭum khat nan independent-in Khawhai bial aṭangin MLA atana thlan a ni. Mizoram state a nih hnua MLA inthlan hmasa ber kum 1987-ah MNF ticket-in Khawhai bialah vêk MLA atan thlan tlin a ni a, kum 1998-ah MNF ticket-in North Vanlaiphai bialah thlan tlin leh niin, Assembly speaker atan ruat a ni.

R Lalawia hian hun rei tak chhung zunthlum a nei a, January 15, 2019 khan MAX Hospital, New Delhi an panpui a, ngawr (TB) leh pneumonia-in a tlakbuak belh tih hriat a ni. March 12, 2019 khan Aizawlah hawpui a ni a, Aizawl Hospital-ah enkawl nghal a ni. Ṭhat chhuah tak tak awm tawh loin March 27, 2019-ah a thi ta a ni.

Nimin Assembly session-ah hian chief minister Zoramthanga leh minister dang pali - R Lalzirliana, Lalruatkima, Dr K Beichhua leh TJ Lalnuntluanga ten paper an pharh. Kumin March thlaa budget session-ah budget puitling pharh theih a nih loh avangin Finance changtu chief minister Zoramthanga chuan March 19, 2019 khan Vote on Account-in thla li (April-July) chhunga Mizoram sorkar sum hman tur Rs. 33,54,65,96,000 a pharh.

Tun ṭum session-ah chuan budget puitling pharh theih a ni dawn a, vawiinah Chief Minister-in a pharh ang a, chumi hnuah thuthar thehdarhtute a kâwm dawn a ni.

Zoramthanga    :    Report of the Director of Local Fund Audit on the Accounts of Local Authority for the Accounting Year Ended 31st March, 2017

R Lalzirliana    :    10th Annual Report 2017-2018 of the Joint Electricity Regulatory Commission for Manipur and Mizoram

Lalruatkima    :    Copy of the Mizoram (Land Revenue) (Amendment) Rules, 2019

Dr K Beichhua    :    Mizoram Juvenile Justice (Care and Protection of Children) Rules, 2019

TJ Lalnuntluanga    :    Copy of the Mizoram Lokayukta (Amendment) Rules, 2019