KMMTP-a zangnadawmna chinfel thuai theih nan sorkarin hma a la - CM Zorama

Chief minister Zoramthanga, PWD changtu chuan, Kaladan Multi Modal Transit Transport Project (KMMTTP)-a zangnadawmna chinfel loh la awmte chu chinfel thuai a nih theih nan sokarin hma a lak thu House a hrilh.

MNF member pahnih F Lalnunmawia leh Vanlalṭanpuia te zawhna inṭâwm chhanna kal zelah Chief Minister chuan, "KMMTTP-ah hian Mizoram sorkarin a tih tur chin chu a zo thawkhat tawh. Zangnadawmnaa buaina awm chingfel turin theihtawp chhuah a ni. Burma lama kawng laih tur km. 90 vel chu khawih lohin a la awm," a ti.

Zoramthanga chuan, Myanmar rama kawng laih turah contractor thlan a nih tawh thu sawiin, "Underground an tam a, Myanmar sipai nen an inkah reng avangin an huphurh viau," a ti a; hna thawktu turte chu hel leh Myanmar sipaite'n an tihbuai loh nan theihtawp an chhuah tur thu a sawi.

Kawrpuichhuah lama Bangladesh leh India insumdawn tawnna tur chu ram pahnih sorkar hmalakna tur a nih thu sawiin Chief Minister chuan, "Ministry an in form thar a, department an insiam rem mek avangin hma a lak tak tak theih rih loh. Bangladesh leh India sorkar nawr tur kan ni a, remchang hmasaah nawr nat kan tum. Bangladesh Prime Minister pawh ka sawipui tawh," a ti.

Commerce & Industries minister Dr R Lalthangliana chuan, KMMTTP chu March 2020-ah hawn tum a nih thu leh, tunah hian hna thawh tur zawng zawng aṭanga 85.50% zawh a nih tawh thu a tarlang.