Pa ei vangin mi 1 a thi Mi pathum enkawl mek

Nginkhanvungi (58) w/o Liandokhena, Ngur khua chu pa ṭha lo ei vangin nimin zing khan Champhai District Hospital-ah a thi a, an chhungkuaa mi panga zinga pathum dangte pawh pa ṭha lo ei vangin damdawi-inah enkawl mek an ni.

Thu dawn danin, Liandokhena te chhungkua hian June 10, 2019 zan khan pa chi khat - pa-artui an tih chu zanriah chawah an hmeh a, a ei hnu deuhah an chhungkuain an pum a nuam lo lo ṭan a ni. June 10 zan chu in lamah an awm a, an pum ná a reh theih loh avangin June 11, Thawhlehni khan tûkṭhuan ei khamah an chhungkuaa puitling pangate chu Champhai District Hospital panpui an ni.

Damdawi-in panpui an nih hnuah ṭhenkhat chuan ziaawm lam an pan a, nu ber Nginkhanvungi erawh Thawhlehni zan aṭangin a harh ṭha thei lo a, nimin zing dar 4:30 khan a natna tuar loin a thi ta a ni. Damdawi-ina dah luh ve tho Liandokhena, chhungkaw pa ber chuan a nupui ruang chu damdawi-in aṭangin drip khai chungin an khua Ngúr-ah a zui haw a, mahse, a chauh zual deuh avangin Champhai damdawi-in panpui leh nghal a ni.

Liandokhena bakah an fanu Langngaihluni leh an monu Lunmuanchingi te pawh Champhai damdawi-inah enkawl mek an ni a, ngaihtuahawm lutuk erawh an ni loa thu dawn a ni. An fapa erawh chu damdawia enkawl a nih hnuah damdawi-in aṭangin chhuahtir a ni tawh.