MSU-in MSSSB din ṭha an ti lo

Mizo Students Union (MSU) General Headquarters chuan thuchhuah siamin, Mizoram sorkarin Mizoram Public Service Commission (MPSC) tihlen aia sum sên tam zawkna tura Mizoram Subordinate Service Selection Board (MSSSB) din a tum chu ṭha lo an tih thu an tarlang.

MSU chuan, Cabinet meeting-in MPSC-in hna lak chungchanga harsatna a tawh ṭhinte sutkian tuma ngaih theiha ngaihtuahna a séng chu lawmawm an tih thu an sawi rualin, "Hna lâk chungchanga harsatna kan neih sukiang tura sorkarin MPSC tihlen harsa a tih ṭhin viau lai a, mipui sum tam zawk sêng tura MSSSB din kher ṭul a ti hi MSU chuan a lo thlàwna mipui sum khawhralna turah kan ngai a, ṭha kan ti lo hle a ni," an ti.

MSSSB chu a piang a nih pawhin uluk takin an vil reng dawn tih sawiin MSU chuan, "Central-a UPSC leh SSC-in felfai taka hna lak an kalpui anga MPSC leh MSSSB hian felfai leh chak zawka hna lak an kalpui ngei theih nan thuneitute pawhin ruahmanna an siam kan phût tlat a ni," an ti a; party induhsakna leh hleihluak taka duhsak zawngte hna inpekna mai a nih chuan nasa taka an dodal dawn thu an tarlang.