Session tharah MZU Southern Campus-ah class ṭan hman tum a ni - HTE Minister

Higher & Techni­cal Education (HTE) minister Dr R Lalthang­liana chuan MZU Southern Campus atan academic session thar (2020-2021) ah class ṭan hman ngei tura ṭan an lak thu a sawi.

Nimin Assembly Session-a MNF member Zothantluanga zawhna chhangin Dr R Lalthangliana chuan MZU Southern Campus din phalna Ministry of Human Resource Development (MHRD) aṭanga hmuh a nih veleh class ṭan vat a nih theih nan hma lak mek a nih thu sawiin, "Campus hawnna tur hmun hi ngaihtuah mek a ni a, Pukpui VC area-ah hmun a awm thei tura beisei a ni. Kum 2020-21 session aṭanga zirna ṭan theih beisei a ni," a ti.

Dr R Lalthangliana sawi danin, MZU-a class ṭan lailawkna atan Pûkpuia Engineering College building-te hman tum a ni. Mahse, helai hmunah hian tui, electricity leh approach road siam a ngaih bakah faculty quarter turte a ngai dawn a ni. Heng mamawh hrang hrang atana senso ngai zat tura chhut chu cheng vbc. 10 chuang a ni a, Chief Minister chuan file-ah a ziak tawh.

INC member Zodintluanga'n MZU western leh eastern campus din hun tur zawhna chhangin HTE Minister chuan, "University campus hi a hautak khawp mai, building leh faculty-te a ngai. Cheng vbc. 100 tel a ngai," a ti a, western leh eastern campus din hun tur chu sum a hau tak avangin a hun tur a sawi theih loh thu a sawi.

HTE Minister chuan MNF member Dr ZR Thiamsanga zawhna chhangin, Mizoram chhung college hrang hranga zirtirtu indaih lohna phuhruk tum reng a nih thu a sawi a, "MPSC advertisement kaltlangin post 19 hnawhkhah tum mek a ni," a ti.