MCAB-in kohhran tan loan pung an tihniam

Mizoram Cooperative Apex Bank (MCAB) chairman T Lalmuanpuii chuan, nimin khan an pisaah thuthar thehdarhtute a kâwm a; kohhranin biak-in leh hall sakna atana loan an pûk ṭhin - Church loan chu a pung an tihhniam thu a sawi.

T Lalmuanpuii chuan, MCAB chu Mizorama bank zingah Church loan-a a pung tuk tlem ber an nih thu sawiin, "Vawiin aṭanga hman ṭan turin church loan interest hi kum nga atan 7.30%, kum sarih atan 7.50% leh kum 10 atan 7.90% ni turin ruahmanna kan siam thar. Kohhran hian min dawr nasa a, kohhran 2,000 chuangin min dawr tawh a, lawmthu sawina atan interest pawh kan tihniam a ni," a ti.

MCAB Chairman sawi danin, MCAB branch manager-te'n head office kaltlang kher loin church loan chu cheng nuai 40 chin an pe chhuak thei a; quarantor atan pawh sorkar hnathawk kher a ngai lo a, kohhran committee zinga pakhat hman a nih chuan pawm a ni.

Apex Bank chu Vairengte pêl lo bank a nih thu sawiin T Lalmuanpuii chuan, "Pawisa lut leh chhuak reng reng Mizoramah vek a ni. Tunah hian duhsakna kan dawng nasa a, kan lawm tak zet. Zirlaite scholarship pawh kan bank-ah vek a lut tawh a, Mizo mipuite min duhsakna a zarah bank-in hma a sawn zel a ni," a ti.

T Lalmuanpuii chuan, MCAB-in branch an neih lohna khuaah kutke pawimawh tak Primary Agriculture Credit Cooperative Society (PACS) an neih thu sawiin, "PACS hi bank hnuaia din a ni a, bank ang chiaha mipui deposit dawn leh loan pek pawh tih theihna a ni," a ti a; NABARD nen ṭang dunin PACS Development Cell an din thu a sawi.