KHAWTHLIR

Mizoram State Commission for Women chairperson thar Lawmchhungi chuan nimin khan a pisa luahin a mawhphurhna thar a la ṭan. Office a luah ṭannaah hian Rev. C Lalsangliana’n Pathian hnena hlanna a neihsak a ni. Lawmchhungi chuan, Commission chu tum mumal tak neia din leh siam a ni tih sawiin, "Thuneihna sang tak nei a ni a, hmeichhiate chunga harsatna chi hrang hrang thleng ṭhin laka a ṭul ang zela ṭanpui tura beisei a ni," tiin, theihtawpa hna thawh a tum thu a sawi.

Mizoram Cooperative Apex Bank (MCAB) chuan Aizawl Press Club president room-a hman turin computer leh printer thar an pe. Computer set hi MCAB chairman T Lalmuanpuii chuan nimin khan Aizawl Press Club-ah MJA president Zonunsanga Khiangte kutah a hlân a ni.

Information & Public Relations (IPR) department chuan Mizoram Diary 2020 tur a buatsaih ṭan. Diary thar turah hian hmaih palh emaw, tihsual palh a awm loh nan diary-a chuang tur head of department/official/board/commission hming leh an telephone number-te chu IPR Directorate-ah July 31, 2019 ral hmaa thehlut turin an ngen.

Traffic SP Rodingliana Chawngthu chuan thupek chhuahin, Aizawla taxi intlân chhâwkna atana kalphung hman mekah, June 14, Zirtawpni chu taxi zawng zawng tlân theih ní tura siam tawh chu tihdanglam a ni a, a tuk June 15, Inrinni (YMA Day)-ah taxi zawng zawng tlan theih a nih zawk thu a tarlang. June 14-ah chuan taxi ‘B’ leh ‘C’ sticker belte an tlan thei dawn a ni.

Aizawl District Magistrate chuan, Mizoram Legislative Assembly session neih lai, June 12-27, 2019 chhungin harsatna a awm loh nan Dak Inpui leh Raj Bhavan chhim lam gate inkarah vantlang, politics, sakhuana leh thil dang vanga mi panga aia tam pun khawm leh bengchheng siam a khap. Khapna hian dan leh thupek kengkawhtute a huam lo.