Eptu pawlte'n MPSC hna chhuhsak an dem Cabinet thutlukna dodal turin mipui an ngen

Eptu pawl pahnih - Congress party leh ZPM ṭhalaite chuan thuchhuah siamin, MNF kaihhruai sorkarin sorkar hnathawk group-B non-gazetted lakna (recruitment) MPSC kut aṭanga a chhuhsak chu an dem thu an tarlang. Congress party chuan Cabinet thutlukna chu Mizoram mipuiin an dodal a ngaih thu an puang.

MPCC chuan, MNF sorkarin MPSC ring zo loa sorkar hnathawk tam zawk lakna tur a chhuhsak chu pawi an tih tak zet thu an sawi a, "MNF ze dik tak, dan leh hrai pawisakna nei miah loa sorkar hnaa party mite thun tumna kal zelah kan ngai," an ti.

Congress party chuan, MNF sorkarin group-B (non-gazette chin) hna lak buaipui tura Mizoram Subordinate Services Selection Board (MSSSB) din thar a tum pawh tun hmaa MNF sorkar hna lak ṭhin dante ngaihtuah­in, party mite chauh sorkar hnaa thun tumna hmanraw dik taka an ngaih thu an sawi.

MNF chu a ṭha zawnga danglam tumna nei loah puhin MPCC chuan, "MNF sorkar tharin MPSC thuneihna chhuhsak a tum mek dan te, MPSC kaltlang loa zirtirtu 946 an lak theih nana dan awm sa tihdanglam an tum mek dante en hian, kum 10 liam taa MNF sorkar, hnathawktu lak kawnga che ṭawp tak leh tuna MNF sorkar thar hi a la inang reng a ni," an ti.

MNF sorkar ruahmanna chu kaltlangpui a nih chuan sorkar hna lakna reng rengah MNF party mite leh an mi duhsak zawngte an tling zel dawn tih sawiin Congress party chuan, "Rim taka lehkha zirin awmzia a awm tawh dawn lo. Chuvangin, Mizoram ṭhalai, hna zawng laite leh zirlai zawng zawngte chu politics rilru tel miah loa an awmna hmun apianga sorkar hmalakna dik lo tak hi a theih ang anga dodal turin kan ngen a ni," an ti a; nu leh pate pawh an fate hma lam hun thui tak hriltu a nih avangin MPSC chungchanga sorkar hmalak tumna chu lo dodal turin an ngen.

Zoram Peoples' Movement (ZPM) ṭhalaite chuan, Mizoram sorkarin MPSC kut aṭanga group-B non-gazetted post recruitment a chhuhsak chu MNF party mite an duhsak theihna tura hmai phih faina hmanruaa an ngaih thu an tarlang. ZPM ṭhalai chuan, Council of Ministers meeting-in MPSC mawhphurhna laksak ṭhen a, group-B non-gazetted chu MSSSB hmanga lak ṭhin tura thutlukna a siam chu demin, MPSC kaltlanga hna lak chu him leh ṭha bera ngaih a nih thu an sawi a; hna lak chungchangah MPSC a kal muang a nih a, thawktu indaih loh vang a nih chuan hnawhkhat thuai turin Mizoram sorkar an phût a ni.