Mizoram BJP president thar atan GS ni lai Vanlalhmuaka thlang

BJP, Mizoram Pradesh president atan general secretary ni mek Vanlalhmuaka thlan a ni a, nimin khan puan chhuah niin, president kal chhuak Prof. JV Hluna a thlâk ang. BJP National Council member atan Nirupam Chakma thlan a nih thu puan a ni bawk.

Nimina BJP Mizoram State Office-a inkhawmah Mizoram BJP hruaitu thlan a ni a, central BJP aṭangin inthlanpui turin Lok Sabha MP Vinod Sonkar-a'n a telpui. Vinod Sonkar chuan, Vanlalhmuaka chu chuhtu dang awm loin BJP, Mizoram State president-ah a tlin thu a puang a ni.

Vinod Sonkar chuan, central BJP-in Mizoram a ngai pawimawh hle nia sawiin, Mizoram BJP president thlan hmain national vice president-te'n state council member-te aṭangin state president tura ṭha tur an thlang lâwk tawh tih a sawi a, "State president thar atana Vanlalhmuaka thlan a ni hi a lawmawm hle. BJP national president thlannaah Mizoram chuan vote a nei thei dawn a, state lian UP-te pawhin vote an nei thei lo a ni," a ti.

President kal chhuak Prof. JV Hluna chuan President chu duhsakna hlânin, Mizoram BJP-in hma a sawn phah ngei a beisei thu a sawi a; Mizoram BJP president a nih chhunga an thawhhonaah a lawm thu a sawi nghal. Mizoram BJP President thar chuan, an mawhphurhna thar chu lawmawm a tih thu sawiin, "Hetiang dinhmun ka nih theihna chu Prof. JV Hluna vang a ni. Mizoram leh hnam tan theihtawp chhuahin kan kal dawn a, kum 2023 MLA inthlan awm turah sorkarna siam ngei turin theihtawp kan chhuah dawn a ni," a ti. Vanlalhmuaka hi December 12, 1971-ah a piang a, Mizoram BJP-ah president a nih hma zawng general secretary i/c Organization a ni.