Art exhibition 'Abode of Peace' ṭan a ni

Santiniketan, West Bengal-a Mizo awm ṭhinte chuan art exhibition - 'Abode of Peace' tia an vuah chu nimin khan Dawrpui Multipurpose Centre-ah an buatsaih a, Lalit Kala Akademi V-Grade artist Tlangrokhuma'n a hawng.

Exhibition-in a tum ber chu - art zalenna leh huam zauhzia te, páwn lam lang theia mawina leh nalhna mai ni lo, thlir dan danga thlir a hlutna leh mawina hmuh thiamte a ni. Exhibition hawngtu Tlangrokhuma chuan, Mizote'n art an dawnsawn dan leh thlir dan chu her rem a ṭul thu a sawi a; art chuan thil mawi leh nalh chauh a huam loh thu leh a aia zau fê a huam thu sawiin, artist-te leh thlirtu mipuite'n hmasawnna tur an neih thu a sawi bawk.

Abode of Peace-ah hian Mizoten an la hmelhriat tam loh, installation leh ceramics bakah print making-te pho chhuah a ni a; lim siam, lim tuk leh thlalakte pawh pho chhuah a ni. Exhibition hi vawiin leh naktukah chhunzawm a ni ang a, a duh apiang tan tlawh theih a ni.

Abode of Peace-a tel tam zawk chu Visva-Bharati University, Santiniketan hnuaia Kala-Bhavana (School of Fine Arts)-a zir chhuakte an ni a, Santiniketan-a awm ṭhin mi dang pahnih an tel bawk.