Central aṭangin a tam theih ang ber Sum hai luh kan tum - Chief Minister

Chief minister Zoramthanga chuan nimina Assembly House-a budget a pharh zawhah Assembly Annexe-ah thuthar thehdarhtute a kâwm a; sorkar laipui aṭangin a tam thei ang ber sum hai luh an tum thu a sawi.

Chief Minister hian budget chungchang thuthar thehdarhtute a hrilhfiah a, "Kan budget hi chu a chî tur chauh a ni. Central-ah sum hai chhuah tur tam tak a awm a, chu'ng chu tu chan tur mah a ni bik lo. Project siam a, sum hai chhuak thiam thiam tan a ni mai. Project atana kan tum ve tur (state matching share) atan kan pawisa neihte hi hman a ni ang," a ti.

Budget chu duh anga buatsaih ṭhat a nih loh thu sawiin Zoramthanga chuan, "December 15, 2018-ah sorkar lak luh a ni a, Krismas-in a zui a ni. Hna kan thawk ṭan dawn chauh a, Lok Sabha inthlan a ni a, kan campaign char char. Inthlan zawhah pawh May thla chhung deuh thaw Election Model Code of Conduct-in min phuar leh a ni," a ti a, kum dang anga an inbuatsaih ṭhat hman loh thu a sawi.

Chief Minister chuan, department ṭhenkhat chuan sum an indaih lo ang tih a chian thu sawiin, "Finance department leh SEDP-ah duh duha hman theih untied fund eng emaw zat kan dah a, a ṭul angin kan inpe zel dawn. Nakkum lamah chuan kumina kan dinhmunte thlirin, ṭha zawkin kan inruahman thei tawh ang," a ti.

Leiba chungchang sawiin Zoramthanga chuan, "Sorkar leh sorkar inkara leiba hi chu engto chiam chi a ni lo. Kan hun hmasaa cheng vbc. 3,000 vel leibá kan neih khan state liante chuan cheng vbc. maktaduai chuang leibá an lo nei tawh," a ti a; sorkar leh sorkar inkar ni lo, rulh ngei ngei ngai leiba ngah erawh a ṭhat loh thu a sawi.

Thuthar thehdarhtute zawhna chhangin Chief Minister chuan, "SEDP-ah pawisa páwng sem a ni dawn lo. Project-ah mipui hnathawhna tur a tam thei ang ber ruahman a ni dawn. NLUP leh SEDP danglamna chu - NLUP chu a sem a sem a ni a, SEDP chu rah chhuah tura inthuamna a ni," a ti.

Chief Minister ṭawiawmtu minister Dr R Lalthangliana chuan, SEDP avangin department-te hnathawh tur khawih buai vak a nih dawn loh thu sawiin, "SEDP leh NLUP inan lohna chu - NLUP chu sem a ni tawp mai a, SEDP-ah chuan project base-in kan kal dawn," a ti a; an budget neih hmasak bera an flagship programme atan sum an dah thei chu thil lawmawm tak a nih thu a sawi.