AYUSH doctor-te'n inkhawmpui an hmang

Mizoram AYUSH Doctors’ Asso-ciation chuan, nimin khan Aijal Club-ah General Conference vawi 14-na an hmang a, Health minister Dr R Lalthangliana’n a hmanpui.

Health Minister chuan, Mizoramah AYUSH Directorate thar piang ta chu lawmawm a tih thu sawiin, AYUSH doctor-te ṭan tlânna leh thawktute'n an bawhzui chak vang nia a hriat thu a sawi a; directorate thar a nih avangin a tìr aṭanga fûke kimin a awm thei nghal dawn lo tih hre tura chahin, "AYUSH Directorate hmunhmá buatsaihna kawnga theihtawp chhuahin kawng dap mek a ni," a ti.

Dr R Lalthangliana chuan, AYUSH zir chhuakte chu sorkara luh tum ngawr ngawr lo a, zirna sang zawkte beia ṭan la turin a fuih a, "AYUSH hmasawnna atan ramhmul damdawite ṭangkai zawka dawmdawi siamna atan a hman ṭangkai theihin a rinawm a, hemi kawngah hian AYUSH doctor-te hi zirbingnate neia ṭan lak a ngai a ni," a ti a; ramhmul damdawi lamah Mizoramin hlâwkna a têl thei nan kawng hrang hrangin State Medicinal Plants Board hmanga hmalak tum a nih thu a sawi.

Inkhawmah hian Health & Family Welfare principal director leh AYUSH-a director Dr F Lallianhlira pawhin thu a sawi a; MADA president Dr C Vanlalhlimpuia’n thu a sawi bakah, general secretary Dr Lalchhuansanga Pachuau-in report a pe a, chawhnuah scientific session hun hman a ni.

Mizoram AYUSH Doctors’ Association-ah hian member 189 an awm mek a, sorkara a ngheta thawk mi 11 leh National AYUSH Mission hnuaia thawk mi eng emaw zat an awm.