KHAWTHLIR

46th. Assam Rifles chuan vawiina World Blood Donor Day thleng tur pualin nimin khan Aizawla an hmunah blood donation camp an huaihawt a, Aizawl Civil Hospital tan thisen unit 20 an pe a, a petute mipa 19 leh hmeichhia pakhat an ni. Nimin vêk khan 1st. Assam Rifles pawhin Lunglei Civil Hospital-ah thisen unit kua (9) an pe bawk. 

School Education minister Lalchhandama Ralte chuan, nimin khan Tlungvel Higher Secondary School-in kumin HSSLC Examination-a an tih ṭhat lawmna inkhawm an buatsaih a hmanpui. Tlungvel HSS hi kum 2010-a din, Arts subject-te zirna a ni a, kum 2018 aṭangin lumpsum aided-ah dah a ni. A din tirh aṭanga kumin thlengin HSSLC candidate 192 an nei tawh a, chu'ng zinga 190 (98.96%) chu an pass a; kuminah pawh an candidate zirlai 25-te an pass vek a ni.

Lawngtlai District Consultative Committee, District Level Review Committee leh District Level Security Committee chu nimin khan DC conference hall-ah an ṭhukhawm a, an district chhunga bank hrang hrangte hmalakna an thlirlet. Meeting-ah hian agriculture kaihhnawiha loan pek chhuah lama ṭan lak a tul thu sawi lan niin, zirna kaihhnawih leh mipui hamṭhatna hrang hrang puanzar kawngah bank leh line department-te'n tan la leh zual se, an ti.

Mamit District Level Coordination Committee chu nimin khan an chairman, DC Dr Lalrozama hoin a pisaah 7th Economic Census chungchang an sawiho a, an district chhunga vill-age council 87 leh sub-village 11 ah economic census hi neih tur a ni tih tarlan a ni.

Labour, Employment, Skill Development & Entrepreneurship (LESDE) department chuan, nimin khan Govt. Champhai College-ah Job/Skill Fair cum Career Guidance an buatsaih a, khuallian LESDE director Lal-hmunsanga Hnamte chuan zirlai kal khawmte chu tum mumal tak nei a, hlawhtlinna chang tura taima leh rinawm taka bei turin a chah.