CM-in PAHOSS hnuaiah ṭanpuina a sem
Aizawl khawpuia traffic tâwt lutuk tihziaawmna tura scheme duan, Parking House Support Scheme (PAHOSS) hnuaiah a vawi khatna atan nimin khan Vanapa Hall-ah chief minister Zoramthanga'n ṭanpuina sum a sem. Chief Minister chuan, PAHOSS chu an kalpui zel dawn a, a ṭul chuan cheng nuai 5,000/6,000 thlenga an dah dawn thu a sawi.
CM Zoramthanga chuan, an sorkar hma aṭang tawhin Aizawl traffic tâwt tihziaawm dan tur a ngaihtuah nasat thu leh an sorkar veleh an buaipui nghal thu a sawi a, "Keimahni'n budget kan neih hmain PAHOSS atan cheng nuai 1,000 kan dah nghal a, cheng nuai 5,000/6,000 pawh a ṭul phawt chuan kan dah dawn a ni," a ti.
PAHOSS chu a ṭha hle dawn a, diltu pawh an tam tih sawiin Zoramthanga chuan, "Chhunah motor park nan an duh dawn a, zanah garage atan a ni leh ang a, chuta ṭang chuan thla khatah tam tak an la lut thei dawn. A luah man aṭanga an sum lak luh chu deré pawh sorkarin kan la dawn lo, a neitute'n an pumbilh vek dawn a ni," a ti a; motor dah man to lutuk tur erawh chu AMC-in an véng dawn a, rate an siamsak dawn thu a sawi.
Chief Minister chuan, PAHOSS chu a huang an zauh zel dawn a, kum dangah pawh zau zawka tih zel leh district khawpui dangah pawh kalpui an tum thu a sawi a, "Nakinah chuan north east state dangte leh hmun danga mite hian min rawn entawn sup sup ang a, PAHOSS an ti ve sup sup mai ang," a ti.
Zoramthanga chuan, Aizawla kawng chhâwng siam dan tur a ngaihtuah nasat thu sawiin, "A ban pan deuhin, hmun heh lo turin kan ti ang a, traffic tibuai loin a kalpui theih dawn a. A bangah wire hnawk zawng zawng pipe-in kan kaltir ang a, mi ram a su lo ang a, kan kawng chinah chiah chiah zel ban kan phun ang. Aizawl hi state capital zingah traffic jam lian tham awm lohna awm chhunah siam kan tum a, kawngpuia motor parking a awm loh chuan kan ti thei ngei ang," a ti a; Aizawl chu mipui tan awlsam taka lên vel theiha siam theih an inrin thu a sawi.
SEDP chungchang sawiin Chief Minister chuan, "Sem lam kan ti dawn lo. Hna thawh tur tuk a, an chem, tuthlawh, chaw fûn tumsak kan tum a ni," a ti. Mizoram chu ram rálmuang, ruahtui ṭha, lehkhathiam awm tamna, ṭawng khat hmang, discipline society, lei hnuaia oil leh gas tamna a nih avangin retheia awm reng a dik lo tih sawiin, "Kan ram hi a zau a, hlawhfa nena enkawl tham a awm a, hlawhfa tur pawh ṭhenawm state-ah an tam. Employee nih tum aiin, employer an nih theih nan Mizo ṭhalaite siam kan tum a ni," a ti.
UDPA secretary Dr C Vanlalramsanga tarlan danin, PAHOSS atan hian UDPA department chuan dilna 563 an dawng tawh a, chu'ng zinga 338 chu a hmunah enfiah tawh a ni. Mi 99 hnenah a vawi khatna atan ṭanpuina pek a ni ta a, mi 99-te hnenah hian cheng nuai 1,746 sem ral a ni.