CYLA-in LADC-ah chhiarpui an kalpui mek Chakma-te'n tihtawptir turin DC an ngen

Chakma V/C leh YCA-te chuan, CYLA thil tih dan chu Mizoram sorkarin National Human Rights Commission (NHRC) hmaah dan lo a nih thu a lo puan tawh Chakma-te chhiar (head count) ang chiah a nih thu an tarlang a, "Hetiang head counting hi Chakma-te vauna leh diriamna a ni. NGO-te hian population census ti turin thuneihna an nei lo a, chuvangin CYLA thil tih dan hi dan kalh leh Constitution kalh a ni," an ti.

Chakma-te chuan Lawngtlai Bawrhsap hnenah hian CYLA-in an kalpui mek Local Area Population Census 2019 chu a rang thei ang bera titawp tur te, CYLA-in data a lo lak khawm tawh zawng zawng chu chhuhsaka tihchhe vek tur te, dan loa chhiarpui neih leh mihring chhiar (head count) ang chi chu Mizoramah a thlen tawh loh nana hma la turtein an ngen a ni.

Lehkhaah hian Sakeilui-I V/C President leh YCA President, Sakeilui-II V/C President leh YCA President, Tuikhurlui V/C President leh YCA President, YCA Zonal Headquarters, Sakeilui President leh General Secretary ten hming an ziak.

CYLA hruaitute chuan, Chakma-te chu Lawngtlai DC hnenah chauh ni loin, sorkar laipui lamah pawh an zualko mek niin an sawi a; LADC chhung ngeia hêk leh an hmalakna dodal a ni chu a ṭul dan anga hma lak zel an tum thu leh chhiarpui chu kalpui zel an tum tih an sawi. Local Area Population Census 2019 hi CYLA chuan vawiinah chhunzawm leh nghal a tum nia thu dawn a ni.