Chapchar Kût atana sum sem dan Ennawn turin Mizoram sorkar phût

Lunglei Ṭhalai Pawl, Champhai Ṭhalai Pawl, Youth for Kolasib, Mamit District Ṭhalai Pawl leh Serchhip Ṭhalai Pawl-te chuan thuchhuah inṭâwm an siam a; kumin Chapchar Kût atana sorkarin sum a ruahman dan chu ennawn an phût thu an tarlang.

District panga ṭhalai pawlte chuan, Mizo kût ropui ber Chapchar Kût hmanna atana Mizoram sorkarin district hrang hrangte hman tur sum a sem dan chu a rualkhai lo lutuka an ngaih thu leh hriatthiam har an tih tak zet thu an tarlang a, "Aizawla Chapchar Kût hmanna atan cheng nuai 65 ruahman a nih laiin, district dang 10 tana sum ruahman belhkhâwm chu nuai 32 a ni. District 10 tana sum ruahman belhkhâwmin Aizawl bik tana sum ruahman chanve pawh a zat lo hi district dangte min dah hniamzia tarlannaah kan ngai a, a lungawithlâk loh kan ti hle a ni," an ti.

Aizawl chu Mizoram khawpui a nih avangin kût hmangtu mihring pawh district dang aiin an ṭhahnem zawk ṭhin tih sawiin ṭhalai pawlte chuan,  "Hnam dangin Chapchar Kût min chhimpuina hmunte a nih ṭhin avangin Aizawl tana sum ruahman hi district dangte aia tam turah kan ngai. Mahse, sum ruahman a inthlau lutuk hi Aizawl chauh ngaih pawimawhna, Mizoram hmun dang ngaihthahna ni ngeiin kan hria," an ti a; sorkar chu Chapchar Kut hmanna atana sum a sem dan ennawn turin an phût a ni.

District pangaa ṭhalaite chuan, "Sorkar hian Aizawl leh Mizoram hmun danga mite pawhin Mizote kût ropui ber Chapchar Kût kan hlut dan leh kan hman dân a inan tlân theihna turin district hrang hrang tana sum ruahman dan hi ennawn leh se kan duh. Tun hnuah hetiang em ema mahni hmasialna hleihluak hi thleng tawh lo se. Mizorama Mizo mipuite inlungrualna tichhe thei ruahmanna hi ennawn ngei turin sorkar kan ngen a ni," an ti.