World Blood Donor Day hman a ni Mizoram puma thisen pe ṭha ber NSS

Nimin June 14 kha thisen petute chawimawina ní, World Blood Donor Day vawi 16-na a ni a, Mizoramah pawh Aizawl leh district khawpui hrang hrangah hman a ni. Thisen pe ṭha pawlte hnenah chawimawina leh lawmthu sawina hlan a ni a, National Service Scheme (NSS) chu Mizoram pumah kum 2018-19 chhunga thisen pe ṭha ber an ni.

World Blood Donor Day hi Aizawlah chuan MSACS, Association for Voluntary Blood Donation leh National Health Mission huaihawtin Dawrpui Multipurpose Hall-ah hman a ni a, MLA Dr ZR Thiamsanga'n a hmanpui. Dr ZR Thiamsanga chuan, thiamna a san tial tial laiin, natna pawh a pung ve zel tih sawiin, "Thisen mamaawhna a sang tial tial. Thisen hi a tlukpui mithiamte'n an la siam thei lo a, chuvangin, a petu tur an awm zel a ngai. Mi tlawmngai, mi dangte tana malsawmna ni ṭhin kan ni a, chu chu kan Kristianna leh Mizona nen pawh a inhmeh hle a ni," a ti.

ZR Thiamsanga chuan, "Thisen petute hi kan hnam pasalṭhate an ni a, chawimawi an phû a, an phû angin kan chawimawi thei lo zawk a ni," a ti a; Mizoram thisen mamawh zawng zawng chu a thlawna dawn vek theih nan ṭhalaite an ṭan a ngaih thu sawiin, "100% voluntary tling turin ṭan i la lehzual zel ang u," a ti. Thisen pe theia awm chu Pathian malsawmna a nih avangin lawm nacháng hre chunga mi nunna chhanhimna atan thisen pek uar zel turin Mizo mipuite a sáwm a ni.

Dr ZR Thiamsanga chuan, Aizawl Civil Hospital blood bank-ah doctor pahnih chauh an awm avangin doctor dah belh ngei a ngaia a hriat thu te, ACH blood bank chu private hospital zawng zawng pawhin an rin vek avangin an thawk rim hle tih private hospital-te pawhin an hriatpui se a duh thu a sawi bawk.

MSACS pro­ject director Dr Lalthleng­liani chuan, Mizoram chu state mipui zat aṭanga tehin HIV vei tamna ber state a nih thu sawiin, "Hei hi keimahni'n kan zuk report vang ngawt a ni lo, enfiahna chi hrang hrang atanga hmuh chhuah dan a ni," a ti a; HIV kai lo tur leh thisen pe thei turin nun dan ṭhaa nun a ṭul thu sawiin, "Thisen thianghlim a awm reng theih nan nun dan ṭhaa nung turin ṭan i la zel ang u," a ti. AVBD president C Lalnunnema chuan, blood bank-ah thisen thianghlim a awm reng theih nana pawimawh ber chu regular blood donor tam tak neih a nih thu sawiin, "Pawl hminga thisen pek kawngah kan ti ṭha thawkhat, mahse, camp aṭanga kan hmuhin mamawh a phuhru zo lo. Donation camp huaihawt kher lo pawhin regular taka thisen pek ṭhin hi a pawimawh tak zet a ni," a ti a; Mizote chu camp mai bakah, mimala thisen pek uar zel turin a sawm a ni.

AVBD leh MSACS chhinchhiah danin, kum 2018-19 financial year chhunga Mizorama thisen pek zawng zawng unit 27,079 a ni a, chu'ng zinga unit 23,434 (86.54%) chu voluntary donation niin, unit 3,645 chu replacement donation a ni. Kohhran pawl hrang hranga ṭhalai pawlte'n unit 8,508 an pe a, zirna-in hrang hrangte'n unit 5,943, YMA-te'n unit 1,713 leh pawl dangte'n unit 4,317 an pe a, mimala pek (individual donation) unit 8,073 a awm bawk.

Nimina Aizawla World Blood Donor Day hmannaah hian Central KṬP leader Rev. Dr K Lallawmzuala'n hunserh a hmang a, vawi tam tak thisen dawng tawh mi pahnihin an testimony an sawi a ni. Siahaah chuan District Hospital main building-ah hman a ni a, MADC sorkara exe­­cutive member L Prisila kuallian a ni. Khuallianin thu a sawi bakah, medical superintendent Dr C Lalrosanga leh MTP President-in thu an sawi. Siaha khawpuia vawi 20 chuang thisen pe tawh 15 hnenah chawi­mawina thuziak hlan a ni.

Lawngtlaiah chuan Region Higher Secondary School hall-ah hman a ni a, Lawngtlai additional DC Dr Andrew H Vanlaldika khuallian a ni. Lawngtlai district-a thisen pe tam ber HC Vanlalruatpuia (unit 49) hnenah chawimawina hlan a ni a, nikum June 14 leh kumin June 14 inkara thisen pe tam mi pali Elvis Lalthangzuala, PC Lalbuatsaiha, Ram­dinsanga leh VL Hma­ngaihzuala hnenah chawi­mawina hlan a ni. Pawl hminga thisen pe ṭhate hnenah chawimawina hlan a ni bawk.

World Blood Donors Day hi Serchhipah chuan district medical superintendent Dr ZD Lalmuanawma hoin CMO Conference Hall-ah hman a ni a, sorkar kum kal ta chhunga thisen petu pawl hrang hrang hnenah chawimawina hlan a ni. Sorkar kum liam ta 2018-19 chhungin Serchhip Blood Bank-in thisen unit 1,085 an dawng a, chu'ng zinga unit 1,055 chu a thlawna pek a nih thu leh, blood donation camp ṭum 24 neih a nih thu an tarlang.

Kolasib-ah chuan Medical Superintendent office conference hall-ah hman a ni a, Kolasib district MJA president R Lalhmingthanga khuallian a ni. Khual­lian chuan, "Mi dangte tana malsawmna ni turin hausak kher a ṭul lo a, mi dangte tana malsawmna nih duhna thinlung kan neih aṭangin malsawmna a nih theih. Mi dangte tana malsawmna nih theihna awlsam ber chu thisen pek hi a ni," a ti. April 2018 - March 2019 inkara Kolasib District Hospital-a thisen pe 

ṭha pawlte hnenah lawmman hlan a ni.

A.    Overall Category (Mizoram pum)

1-na    NSS (educaltional institutions)    Unit 5,365

2-na    Kristian Ṭhalai Pawl (KTP)    Unit 4,193

3-na    Mizoram Ṭhalai Kristian Pawl (ṬKP)    Unit 2,104

B.    Religious Category (Aizawl district)

1-na    ṬKP Coordination Committee, Aizawl    Unit 441

2-na    Territorial Salvation Army Youth (SAY)    Unit 297

3-na    Adventist Youth Federation (AYF)    Unit 183

C.    Educational Institution (Aizawl)

1-na    Pachhunga University College    Unit 794

2-na    Hrangbana College    Unit 658

3-na    Government Aizawl College    Unit 390

D.    YMA Category (Aizawl district)

1-na    Keifang Joint YMA    Unit 118

2-na    Aibawk Branch YMA    Unit 107

3-na    Rulchawm Branch YMA    Unit 66

3-na    Bethlehem Vengthlang Branch YMA    Unit 66

E.    Miscellaneous Category (Aizawl)

1-na    Police Training School, Thenzawl    Unit 181

2-na    Mizoram Police    Unit 100

3-na    Mizo National Youth Front (MNYF)    Unit 94