CYMA leh MZP-in CYLA an thláwp

Central YMA chuan thuchhuah siamin, an thawhpui Central Young Lai Association (CYLA)-in Lawngtlai district chhunga Chakma foreigner dap chhuak tura chhiarpui an nei chu ṭha an tih thu leh an thlàwp thu an tarlang.

MZP pawhin CYLA hmalakna an thlâwp thu leh a ṭul chuan puih an inhuam thu an sawi bawk.

CYMA chuan, CYLA hmalakna chuan ram leh hnam humhalhna atan rah ṭha a chhuah ngei theih nan duhsakna an hlan a, "Chakma foreigner dap chhuak tura CYLA hmalakna do zawnga Young Chakma Association (YCA)-te leh Chakma V/C ṭhenkhatte'n hma an la hi CYMA chuan kan hrethiam lo a, hma latute chu titawp nghal turin kan a ngen. Ram leh hnam humhalh nana Chakma census neih tisukuk zawnga hmalakna reng reng a tàwp thlengin kan do dawn a ni," an ti.

MZP chuan, CYLA hmalakna titawp tura YCA-te'n Lawngtlai DC an ngen chu ná an tih thu sawiin, "Chhiarpui neih Chakma-in an duh loh aṭang hian Chakma foreigner Mizoramah an tamzia a lang chiang hleah kan ngai. Kan rama dan loa lo lutte dap chhuah kawngah Zofate kan harh a hun a, kan ṭan rual a ngai tawh tak zet a ni," an ti a; dan loa Mizorama Chakma pém lutte thawn haw an nih theih nan chak taka hma la turin Mizoram sorkar an ngen a ni.

MZP chuan, YCA chu Lawngtlai DC hnena an lehkha thehluh tawh chu a rang thei ang bera hnûk kîr turin an phût a, "CYLA hmalakna hi MZP chuan a tawp thlengin a thláwp tlat dawn a, CYLA-te hi puih an ngaih chuan engtik hunah pawh MZP chu a inpeih reng a ni," an ti.