Vawiinah YMA Day lawm dawn

Vawiin, June 15 hi YMA Day vawi 85-na a ni a, Mizoram chhung leh páwna YMA branch hrang hrangte'n kawng hrang hrangin an lawm dawn a, branch ṭhenkhat chuan nizan khan an lawm ṭan.

YMA Day-ah hian branch tam tak chuan zing karah khua/veng chhung thenfai hnatlang an nei dawn a, chhûna hnatlang nei tur pawh an awm. Branch ṭhenkhat chuan chhun leh zanah intihhlimna hun te, intihsiaknate an nei dawn a, ruai nena lawm tur an awm bawk. Central YMA hruaitute'n insem darhin hmun hrang hrangah an hmanpui dawn a ni.

•    YMA DAY 2019 thupui atan ‘Ram leh hnam humhalh’ hman ni se.

•    YMA Day-ah hian sub-hqrs., group leh branch chhung hmun rem laiah YMA flag zâr chhuah.

•    YMA chu ṭanpui ngaite ṭanpui tura pawl din a nih angin, veng/khaw chhunga mi harsa leh chhumchhiate dap chhuak a, a theih anga ṭanpui ni se, chenna in thawm 

ṭhat ngai leh khawsak harsa zualte a theih leh remchan anga chhawmdawl.

•    Damlo mangang ṭanpui ngaite thisen pe turin YMA branch tinte leh mimal tinte kan inngen a, faina leh thianghlimna hi YMA-ten kalphung ngheta kan lo neih tlat tawh angin, he ni denchhen hian veng chhung thenfai hnatlang a remchan dana neih ni se.

•    Sub-hqrs, group leh branch-ten a remchan dan azirin hospital/home/centre-ahte ṭanpuina thilpek hlan ni se. YMA in, library, lungphun, signboard leh thil dangte tuaithar ni se.

•    Ṭhangtharte-ah tlawmngaihna inzirtir thar leh nan hman tum ni se. Mizo thuam inbel uar tura tan lak nan hman nise.