Zirtirtu 946 lak turin sawi a hlawh 'Hnam Run list' awm loh tiam thei lo A theih chin chinah fair kan tum - Education Minister

Sorkarin muster roll-a zirtirtu 946 a lak tura Mizo Hnam Rûn, MNF block leh unit list a awm lo ang tih a intiam theih leh theih loh Assembly House-a zawh chungchangah, School Education minister Lalchhandama Ralte chuan heng list-te hi a awm dawn loh thu chiang takin a sawi lo a, "A theih chin chinah a fair thei ang berin tih kan tum," tiin a chhâng.

INC member Nihar Kanti Chakma zawhna kal zela ZPM member Dr Vanlalthlana'n zirtirtu 946 lak tur chungchanga a zawhna chhangin Education Minister chuan, "Fair takin kalpui kan tum. Politician-te vêk hian mipuiah sorkar rin tâwk lohna kan tuh. A theih chen chenah a fair thei ang bera kal kan tum," a ti a; zirtirtu an lak dan chu lo en phawt turin member-te a chah.

Lalchhandama chuan, a theih chin chinah zirtirtu 946 an lak turah a khaw mi ngei lak an tum thu sawiin, "A khaw mi a theih loh chuan a khaw hnai tal lak kan tum. Zirtirtu hna dil turte chu mahni district ṭheuha dil turin kan hriattir dawn a, district level-ah chinfel vek kan tum," a ti.

Minister chuan, zirtirtu 946 chu kumin chhung ngeia la hman turin department-in theihtawp an chhuah tih sawiin, "Contract-a lak tur a nih avangin Persons with Disabilities (PwD) Commissioner kan ráwn a, pianphunga rualbanlo tan reservation kan siam lo a, Delhi lamte ràwn a nih leh hnuah reservation kan siam leh a, a file kal chhung a rei deuh nen kan la la thei lo," a ti a, tihfel ngai tlem a la awm thu a sawi.

School Education Minister sawi danin, department-in transfer and posting rules a neih chu hman hleih theih lohin a awm. Transfer and posting rules chu sorkarin a ngaih pawimawh avangin a duangtu tur leh en zuitu tur siam a ni a, ruahmanna an siamte enfiah a ni tawh. Siam rem ngai leh siam ṭhat ngaite June 2019 chhunga zawh tura tih a ni.

Sorkar sikulah pupil teacher ratio (PTR) nena inmil lo deuha zirtirtu awmna a awm tih sawiin Lalchhandama Ralte chuan, "Sikulte sâwi khâwm dan tur duan a ni a, khaw lian deuhah chuan sâwi khawm nual a ni tawh. High school-ah zirtirtu indaih lohna a nasa a, zirtirtu 164 contract-a lak kan dil mek a ni," a ti.

Minister chuan, kum 2017 aṭanga Hindi zirtirtu 1,305-te chawlhtir an nih chungchang chu sorkarna an chan hnuah an ngaihven nghal thu sawiin, "Keimah bakah Chief Minister leh minister Dr Thangtea ten sorkar laipuiah an thlen tawh. Theihtawpin an tan hma kan la a ni," a ti a; Human Resources Development Minister thar hnenah pawh Mizoramin Hindi zirtirtu a mamawhna ziaka a thlen tawh thu a sawi.