KHAWTHLIR

Nimin khan Assembly session-ah MNF member C Lalmuanpuia'n private member resolution a put luh, 'Mizoram sorkarin kum 2008-a district thar pathum - Khawzawl, Saitual leh Hnathial district a hawnte kum 10 lai hlamchhiah an nih hnuah sorkarin tihlawhtling tura chak taka hma a la hi lawmawm kan ti hle,' tih chu sawiho a nih hnuah pass a ni.

AVBD, Champhai Branch leh Champhai District Hospital ṭangkawp chuan nimin khan World Blood Donor Day pualin blood donation camp an huaihawt a, mipa 20 leh hmeichhia 14-te’n thisen unit 34 an pe. Siahaah pawh WBDD pualin blood donation camp an nei a, mipa 19 leh hmeichhia pathumte’n thisen an pe a; Lawngtlaiah pawh WBDD pualin Region HSS NSS-te’n thisen unit 47 an pe a, a petute mipa 33 leh hmeichhia 14 an ni.

Mamit district aṭanga accredited journalist atana thlan thar mi pasarihte hnenah nimin khan Mamit IPRO Paul Rokima’n a pisaah accreditation card a hlan. IPRO chuan, journalist-te chu Mizoram sorkarin chanchinbumite a ngai pawimawhin an chanvo a dah pawimawhsak thu a sawi.

Mizoram Govt. Adhoc Aided High School Teachers Association (MIGAHTA) chuan nimin khan Chanmari YMA Hall-ah inkhawmpui an hmang a, School Education minister Lalchhandama Ralte-in a hmanpui. MIGAHTA chuan sorkar high school hrang hrangte’n hamṭhatna an dawn ṭhin - annual grant, maintenance grant, study tour grant, remedial leh study extension grant, etc. dawn ve an châk tawh thu an tarlang.

May 24, 2019-a Task Force for Government Complex, Luangmual ṭhukhawm chuan, Aizawl DC-in Luangmual Local Council huam chhung, sorkarin Capital Expansion Project atana ram a lo valh tawh chhungah sorkar phalna lo chuan tu pawhin in sak loh tur, tiin an rel a; chutiang tur chuan sorkara an ngen angin Aizawl DC chuan nimin khan in sak phal lohna thupek a chhuah.