NLUP vangin kan GSDP a sang - Hawla

Mizoram Pradesh Congress Committee (MPCC) president Lal Thanhawla chuan nimin khan Congress Bhavan-ah thu a sawi a, "NLUP vangin Gross State Domestic Product (GSDP)-ah Mizoram a sân phah," a ti.

Lal Thanhawla chuan, NLUP dawngtu zingah ṭha taka hmangtu tam tak an awm a, an dinchhuah phah thu sawiin, "NLUP dawngtute vangin India rama GSDP-a state sang pathum zingah kan tel phah. Sorkar laipui chuan tun sorkar kum kal mekah chuan GSDP-ah double digit kai turin min beisei, 7-8 te kan kai ṭhin a, a sang hle," a ti a, NLUP dawngtute'n Mizoram an chawimawi thu a sawi.

NLUP ang deuh sorkar laipuiin kalpui ve an tum nia a hriat thu sawiin MPCC President chuan, "Party pangain NLUP an hêk ṭhin lai pawhin prime minister Narendra Modi chuan a hriate a inhrilhfiahtir hnuah chuan tihtawp a hnêkin, state dangte entawn ve se a duh niin ka lo hria, ka thu hriat hi a dikin ka ring," a ti.

Lal Thanhawla chuan, Mizote chu zu buaipui ber hnam an nia a hriat thu sawiin, "Keini aia hnam hnufual zawk pawh keini aia zu buaipui hi an awmin ka hre lo. Zu kan buaipui loh dan tur kan ngaihtuah a, zu zawrh pahin kan control a ni. Zu dawr ṭhenkhat phei chu an inhralh ṭhat loh avangin an inkhâr hman a ni," a ti a, zu tam se tih chu an duh dan a nih bik loh thu a sawi.

MPCC President chuan, MNF hotupa berin inthlan dawnah cheng nuai 3 tih ziahna lehkha thema inziak a sem a, an sorkar huna cheng nuai thum lakna tur tia a campaign thu sawiin, "Tunah chuan an budget-ah cheng nuai 3 sem tur an dah lo. Mahni insiam lenna tur chuan mite bum an hreh lo," a ti.

Central-a BJP sorkar chuan lal reng an tum avangin democracy an palzût tih sawiin Lal Thanhawla chuan, "CBI, RBI, etc. an tibuai nasa hle. Nasa takin democracy an pawngsual a, eirukna pawh a hluar hle. Supreme Court judge pali phei chuan press conference koin, tun ang tluka democracy tana hlauhawm a awm ngai loh thu an sawi hial a ni," a ti a; judge-te an ṭanrual avangin Supreme Court-ah an inrawlh theih loh thu a sawi.