Hindi zirtirtu tura tling zo 600 chuang awm

Mizoram Hindi Pre-Service Trained Teacher Association (MHPTTA) chuan, Centrally sponsored scheme (CSS) hnuaia Hindi zirtirtu lak theih mai tur post 665, sorkar laipuiin a pawm chu lawmawm an tih thu an sawi a; tun dinhmunah qualified Hindi teacher mi 600 chuang an awm thu an tarlang.

MHPTTA chuan thuchhuah siam­in, Mizoram Chief Minister, Higher & Technical Education Minister, School Education Minister, Secretary leh official dangte hmalakna vanga sorkar laipuia Ministry of Human Resource Development (MHRD)-in CSS hnuaia Hindi zirtirtu lak theih mai tur post 665 a thuphunga a pawm chu lawmawm an tih thu an tarlang a ni.

Hetih lai hian, Right to Education Act-in a phût ang tling zo (Hindi qualified teacher) Mizoramah tlémtê chauh an awm anga School Education Minister-in Assembly session zawh taka a sawi chu hriat chian tâwk loh vang nia a lan thu MHPTTA chuan an tarlang a, "Tun dinhmunah Hindi teacher ni thei tura qualify mi 600 chuang kan awm mek a ni," an ti.

MHPTTA chuan, CSS hnuaia Hindi zirtirtu lakna kalpui a nih chuan RTE-in a phût angin trained teacher chauh dik leh felfai taka la tur leh po­litics-a duhsak zawng thun nan hman tum lo turin sorkar thuneitute an ngen a, "RTE Act-in a phût anga kalpui an nih loh chuan a tàwp thlengin kan do zel ang," an ti. MHRD-in tuna a thuphunga a pawm tawh, Hindi teacher post 665 lak phalna awm tawh chu a rang thei ang bera bawhzuia la thuai turin sorkar an ngen bawk.