HM-in naupang rukbo thuthang a sawifiah
Home minister Lalchamliana chuan nimin Assembly session-ah West Lungdar naupang kum 13 mi rukbo nia thuthang awm chu a sawifiah a, hemi chungchanga thil thleng chu vanduaithlak a tih thu a sawi.
Home Minister chuan February 24, 2020 zanah West Lungdar naupang rukbo tum a nih thu social media-ah a darh nasat thu sawiin, "He thuthang avang hian West Lungdar leh a chhehvela YMA-te'n a rubotu nia puh hnamdang pathum, bolero-a chuang zawn hna an thawk a ni. He thil thleng hi police-te'n an hriat velah February 25 zingah West Lungdar panin an kal nghal a ni," a ti.
Home Minister sawi danin, February 25 zing dar 9 velah South Sabual khaw mipuite'n hnamdang pathum rinhlelh an man nia hriat a ni. Police-te'n a rang thei ang berin South Sabual an pan a, Kulikawn PS-a kalpui turin an la a ni. Mah se, mipui pungkhawmte'n West Lungdar panpui phawta naupang rukbo nia sawi hi entir an rawt avang leh police an tam hneh avangin West Lungdar panpui an ni.
Naupang hian amah rubotute nia a sawi avangin police-in theihtawp chhuah mah se, police chahbelhte an thlen hmain hnamdang pathumte hi mipuiin kut an thlak hman nual a ni. Kut an tawrh nual hnuah harsa takin Aizawl panpui an ni. Bolero leh an bungraw phurh television pariat chu chhu chhiain mipuiin an hal. Naupang rukbo chungchangah hian Kulikawn PS-ah thubuai ziahluh a ni a, motor hal leh kut inthlak chungchangah chuan West Phailengah thubuai ziahluh a ni thung.
Naupang rukbo chungchang hi ngun taka chhui a ni a, naupang rukbo hun nia sawi hi February 24 tlai dar 3 vel a ni. Rubotua puhte hi February 24 ah Silchar aṭanga lo chhuakin chawhma dar 11:27 ah Vairengteah ILP an la a, hemi ni vek hian tlai dar 4:45 ah Leela Hotel, Ṭhuampuiah an lut a, a tuk zingah hotel aṭangin an chhuak a ni. An TV phurhte hi Darlung leh Sabualah mi inah lut kualin an zuar a, chu chu man an ni ta a ni.
Lalchamliana chuan misual nia hriatte zawng tura YMA leh khawtlang mipuiten tha nasa taka an thawh chu lawmawm a tih thu sawiin, "A lehlamah chuan he thil thleng hi a vanduaithlak ka ti. Dan leh thupek hi mimal emaw, mipui pungkhawmin tharum hmangin an lek tur a ni lo. India ram hmun hrang hrangah kan tu leh fate, kan unaute an awmve tih hriat a ṭha hle," a ti a, naupang rukbo nia sawi chhui hna hi police-in an thawh mek thu a sawi.