2019-20 ah MST bus aṭanga sum hmuh aiin enkawlna senso nuai 53.13-in a tam

Kum 2019-2020 (January thleng) chhunga Transports department-in MST bus fare aṭanga sum an hmuh aiin lirthei enkawlna atana sum an hman cheng nuai 53.13-in a tam zawk. Bus fare-ah cheng nuai 168 hmuh a nih laiin, lirthei enkawlna senso atan cheng nuai 221 hman a ni.

ZPM member Vanlalhlana zawhna chhangin Transport minister TJ Lalnuntluanga chuan, "MST bus chuan man hi private bus leh maxicab chuan mante ai hian a tlâwm zawk hle. Thingtlang mipui pawhin harsa loa an ban phak turin chuan man duan a ni. Heti chung hian kum 2019-20, January 2020 thleng hian bus fare aṭangin cheng vbc. 1.68 lai hmuh a ni," a ti.

Transport Minister chuan, MST bus-te chu a hlui tawh thu sawiin, "Sorkar sum indaih lohna avangin a thlakna kan la nei thei mai lo. Chubakah, MST bus tlànna hi a tlangpuiin private operator-te tlan duh lohna hmun, kawng chhe tak takte a ni. Hei vang hian bus enkawlna senso a sang lo thei lo," a ti a; January 2020 thleng bus enkawlna atan cheng vbc. 2.21 sen a nih thu a sawi.

TJ Lalnuntluanga sawi danin, MST Wing hnuaiah thawktu hrang hrang - clerical staff, technical staff, driver leh conductor-te an awm a, district headquarter hrang hrangah an awm darh avangin driver leh conductor-te enkawlna senso bik chhût theih a ni lo.

ZPM member Dr Vanlal­thlana zawhna chhangin Tran­sport Minister chuan, vehicle pollution test-na Mizoram Pollution Control Board-in testing centre a neih lohna hmun District Transport Office-ahte lirthei neitute awlsam zawkna atan dah tum a nih thu a sawi a, "Vehicle emission test hi MPCB chan a ni a, test dawna motor khawih danglam a awm leh awm loh Transport department-in a hre lo," a ti.