Mizoram sorkar hna lâknaah a huna Tih theih loh kan nei lo - MPSC Chairman

Mizoram Public Service Commission (MPSC) chairman Rev. Zosangliana Colney chuan, MPSC-in Mizoram sorkara thawk tur lâkna (recruitment) a kalpui ṭhinah, sorkarin hna lâk tura a tih a huna lâk theih loh an neih loh thu a sawi a; hna an ngah avangin an hna la chhuak ṭhen turin sorkarah ngenna an la thlen loh thu a sawi bawk. MPSC hian Mizoram sorkara thawk tur grade pay 4,200 chin chung lam an la ṭhin.

Vanglaini palai zawhna chhangin Rev. Zosangliana Colney chuan, Mizoram sorkara department-te'n thawktu la tura an tihah 'Chumi chhunga lak ngei tur' tih a awm ngai loh thu a sawi a, "MPSC-in recruitment a tihah hun bithliah a awm lo a, hna a huna lak loh kan nei lo. A rawn ti hmasa apiang kan ti hmasa a, a lo luh hmasak dan indawtin kan ti mai ṭhin," a ti.

MPSC Chairman sawi danin, Mizoram sorkarin sorkar hnathawk indaih lohna chungchanga department-te harsatna chingfel turin kum 2015-ah Renu Sharma Committee/Commission a din a, chu chuan December 14, 2016-ah sorkarah report a thehlut a ni. 

Renu Sharma Committee chuan department hrang hranga thawk tur mi 545 lak belh turin a rawt (recommend) a, chu rawtna ang chuan department hrang hrangin MPSC kaltlangin recruitment an ti chho ta a ni.

Renu Sharma Committee rawtna ang chuan department hrang hrangin MPSC chu recruitment ti turin hna an pe a, UDC leh assistant ringawt pawh department hrang hrangin an hranpa ṭheuhin an duh zat la turin an pe a; hna/post dang tam tak pek an ni bawk. 

Zosangliana chuan, "UDC hi kan la tam a, department hrang hrangin a hran ṭheuhin an rawn ti a, kan buai phah nasa. Keini tan bakah, a diltute tan pawh a buaithlak a, a hlâwmin ti thei ila chu kan ziaawm viau ang," tiin a sawi.

MPSC-in kum tina recruitment a khawih ṭhin pangngai bakah Renu Sharma Committee recommendation anga hna lakin an hna a belh chhah tih sawiin Zosangliana Colney chuan, "Theihtawp chhuahin kan ti char char a, hna a tam avangin kan pawtchhe thiang lo. Heng kan hnathawhah hian kan thawk nasa a, kan hnaah hian muang kan inti lo," a ti.

Rev. Zosangliana Colney chuan, recruitment pangngai leh Renu Sharma Commission rawtna anga thawktu ṭhahnem tak lakna an kalpui lai mekin, Medical Council of India (MCI) duh dan angin Mizoram Institute of Medical Education and Research (MIMER)-a thawk tur hmanhmawh taka lak a ngaih thu a sawi a, "February 2018 aṭangin MIMER-a thawk tur lakna kan kalpui leh rih a ngaih avangin Renu Sharma Commission rawtna anga hna lakna kan kalpui chu dahṭhat leh rih a ni," a ti. Kum 2018 chhunga MIMER-a thawk tur an lak zat chu post hrang hrang atan mi 240 an nih thu a sawi.

MPSC Chairman chuan, "Thawktu min pek belh turin sorkarah kan dil ṭhin a, staff 30-te kan dil laiin pakhatte min pe a, kan indaih thei lo. Assistant, UDC, LDC leh computer operator-te kan mamawh belh hle a, officer chin pawh kan mamawh belh bawk," a ti. MPSC hian July 2013 aṭangin Mizoram sorkara thawk tur, grade pay 4,200 chin chung lam an la ṭhin a, January 2014 aṭangin grade pay 4,200 chin post tlukpuiah chu contract-a thawk turte pawh la tura tih an ni.

MPSC-in kum tin a tih ṭhin, Mizoram Civil Services (Combined Competive) Examination chungchanga zawhna chhángin Rev. Zosangliana Colney chuan, "Sorkarin tihdanglam a tum niin kan hria a, thu chiang erawh kan la hre lo," a ti. Combined Competive exam chu an ti dawn a nih chuan tih ṭan a hun tawh thu sawiin, "Kum dangah chuan May/June velahte preliminary exam an buatsaih ṭhin thu a sawi a, tunah chuan advertisement pawh kan la chhuah thei rih lo," a ti. 

Tun hnaia Cabinet meeting chuan MPSC-in an khawih lai zinga mi, group-B non gazetted post ho zawng chu MPSC-in la tawh loin, Mizoram Subordinate Service Selection Board (MSSSB) din a rél a ni. Sorkar (ministry) ang zawngin, Congress party-in thuneihna an chan laiin MPSC-in sorkar hnathawk lakna a kalpui tur chinah tidanglam a awm nual a; group B / non-gazetted a pek châng a awm a, a chángin a chhuhsak leh ṭhin.

Kum 2013 aṭang chuan an hun tàwp thlengin group B (non-gazetted telin) recruitment zawng zawng pawh MPSC kutah an dah a, kum 2014 aṭangin contract employee lak hna a pe tel bawk. MNF party-in sorkarna an chan hmasak, kum 1998-2008 chhung khan September 2008 hma lam zawngah chuan MPSC hnaah tihdanglam an nei lo a, MPSC kutah gazetted officer chin hna lakna chauh dah a ni a, group B hna lakna pêk a ni lo. An sorkar term tawp lam, September 2008 aṭangin group B lak hna MPSC-ah an pe thung.