Doctor-te'n lungawi lohna an lantir mek

Indian Medical Asso-ciation (IMA) chuan India ram pumah lungawi lohna an lantir mek a, vawiinah pawh lungawi lohna lantir nan hna an thawk dawn lo a, Mizorama doctor-te pawhin an zawm ve dawn.

IMA Mizoram State Branch tarlan danin, India ram pumah vawiin hian zing dar 6 aṭanga tlai dar 6 thleng lungawi lohna lantir nan 'pen down strike' an nei dawn a, hna an thawk dawn lo. Sorkar damdawi-in, mimal damdawi-in leh private clinic zawng zawngah doctor-te'n damlo an en dawn lo a, emergency/casualty service erawh a awm dawn thung.

IMA-in lungawi lohna an lantir chhan hi - NRS Medical College & Hospital, Kolkata-a doctor duty-te na taka kutthlak an nih vang a ni. IMA thu rel angin, IMA Mizoram Branch chuan June 14, 2019 khan an hnathawhnaah badge dum an lo bel tawh a; vawiin hian zing dar 9-ah Aizawl Civil Hospital Casualty kawtah peaceful demonstration an huaihawt bawk ang.