YMA Day hlim taka lawm a ni

YMA Day vawi 85-na chu June 15, Inrinni khan Mizoram pumah leh state páwna YMA branch awmnaahte hlim taka lawm a ni a, Central YMA hruaitute leh ram hruaitute chu hmun hrang hrangah an hmanpui.

YMA Day-ah hian branch tam zawk chu khua leh veng chhung thianfaiin an hnatlang a; branch ṭhenkhatin intihhlimna, infiamna leh intihsiakna hunte an hmang a, zan lama intihhlimna hun leh vantlang inkhawm buatsaih branch eng emaw zat an awm. Branch tam tak chuan an member kawng hrang hranga hlawhtlinna changte chawimawina an hlan.

YMA branch eng emaw zat chuan mi dangte ṭanpuina hun atan an hmang a, veng chhunga khawsak harsa zawkte leh ṭanpui ngaite hnatlangin an pui a; tlai lama YMA Day lawmna ruai ṭheh an awm nual bawk.