Mau leh rua hmanga hmarchhak hmel Tihdanglam theih a nih ka ring - CM

NITI Aayog Governing Council chu June 15, Inrinni khan Rashtrapati Bhavan-a Cultural Centre, New Delhi-ah an ṭhukhawm a, chief minister Zoramthanga pawh a tel. CM Zoramthanga chuan, rua leh mau hmangin India hmarchhak pumpui hmél tihdanglam theih a nih rin thu a sawi a, sorkar laipui hotute chu theihtawp chhuahpui turin a sáwm.

Chief Minister chuan, Mizoram leilung ṭhatzia leh thlai engkim ṭhat duhna a nih thu leh hmasawnna chak taka kalpui tura thawh a pawimawh thu sawiin, "Rua leh mau ringawt pawh transportation system ṭha leh link road chhawrnahawm ruahman a nih chuan Mizoram mai ni lo, India hmarchhak pumpui hmel tidanglam thei tura hmalak a theih ngei ka ring," a ti a; rua leh mau hmanga a hmalak dan tur Prime Minister leh Finance Minister sawipui a tum thu a sawi.

Meeting-ah hian agenda pali - ruahtui khâwl (rain water harvesting), khawkhéng chungchang leh hmalak ngaihna te, aspirational district chungchang leh agriculture sector siamṭhat dan leh security chungchang sawiho a ni.

Rain water harvesting chung-changah Zoramthanga chuan, Mizoramin rainwater harvesting a kalpui dan leh hmasawn zel dan tur te, kumina ruahtui hmuh a tlem vanga thlai chìn hun a tihbuai thu te, thil dang harsatna Mizoramin a tawh dante a sawi. Aspirational district - Mamit district-a hmalakna tur te, agricultural transformation nei tura Mizoram bik tana ruahmanna siam a pawimawh thute a sawi bawk.

Mizoram chu ram rálmuang tak a nih reng theih avanga entawn tur ṭha tak a awm thu sawiin CM Zorama chuan, external aided project approval process thui lutuk siamṭhat a ngaih thu te, North Eastern Council sum tam zawka thuam a ṭul thu te, Mizoram Bamboo Development chu mission mode-a thawh a ṭul thu te, Act East Policy kalpui tura NE state-te pawimawhna te, infrastructure development atana sum tam zawk Mizoram tan ruahman a duh thute meeting-ah a thlen a ni.