KHAWTHLIR

Higher & Technical Education (HTE) minister Dr R Lalthangliana chuan, NEDP hnuaiah college 18-te building construction atan administrative approval cheng nuai 522 pek a nih tawh thu, ZPM member C Lalsawivunga zawhna ziaka chhangin a tarlang. HTE Minister tarlan danin, college 18-te chu an hmuh tur zat pek an la ni lo a, first instalment pek chhuah mek a ni.

Mamit leh Bairabi inkara kawlphetha hruipui, 32kv line thlunna tura ban (tower) hmasa ber phunna tur chu bialtu MLA H Lalzirliana'n June 15, Inrinni khan a lungphùm a phúm. Lalzirliana chuan, Mamit district leh Mamit hmasawnna tura ruahmanna a awm lawmawm a tih thu sawiin, thawktute inpekna ropui a tih thu a sawi.

Food, Civil Supplies & Consumer Affairs (FCSCA) minister K Lalrinliana chuan June 15, Inrinni khan Zuangtuia FCSCA department kudam tlawhin a enfiah. Minister hian kudam chung phui ṭha lo chu June 17, vawiin aṭanga siam ṭha nghal turin a hriattir a ni.

District Executive Force leh District Child Protection Unit ṭangkawpin an buatsaih, naupang kumtling lo dan bawhchhiate leh dan bawhchhiatna avanga tuartuten Police Station-a ngaihngam taka an awm theihna hmun tur Child Friendly Corner chu June 14, 2019 tlai khan Serchhip Police Station-ah, SP R Sathiyasundaram-in a hawng. Serchhip SP chuan Child Friendly Corner chu kumtling lo naupang pawikhawihte enkawl leh venhimna atana ṭangkai taka hman theih a nih ngei a beisei thu a sawi.

Agriculture department bultumin Inrinni zing khan Darlâk khuaah Sub-Mission on Agroforestry (SMAF) hnuaia kuhva (arecanut) ṭiakte chu Mamit bialtu MLA H Lalzirliana hoa sem a ni. H Lalzirliana chuan, Agriculture department-in kut hnathawktute hmakhaw ngai a, hamṭhatna ṭha tak mai an dawng chu lawmawm a tih thu sawiin, kuhva huan neitute chu theih­tawpa enkawl turin a chah.