Minister-in chini sem tur a vai liam

Food, Civil Supplies & Consumer Affairs (FCSCA) minister K Lalrinliana chuan June 15, Inrinni khan Zuangtuia FCSCA kudam aṭangin miretheite hnena man tláwm zawka chini sem tur a vai liam. Chinite chu motor pahnih hmangin phurh chhuah nghal a ni.

FCSCA Minister chuan, retailer-te kaltlanga department-in chini man tláwm zawka a hralh ṭhin chu hun eng emaw chen tihtawp a nih hnua bul an ṭan ṭha leh tih a sawi a, "Miretheite'n chini an mamawh angte man tláwm zawka an lei theih hi Chief Minister ngaih pawimawh ber pakhat a ni a, sorkar intiamna a ni," a ti.

Sorkar thar din a nih ve leh chini sem dan tur ruahmanna siamin theihtawp chhuaha hmalak nghal a nih thu sawiin K Lalrinliana chuan, "Sorkar laipui aṭanga Mizoramin chini sem theihna allocation a neih chu AAY beneficiary-te tan thla khatah chhungkaw pakhatin kg. khat zel chauh a ni. Tam zawk sem tura sum sên belh turte uluk taka ngaihtuah a ni," a ti a; budget hman tur a la awm loh avangin allocation neih sa sem phawt a nih dawn thu a sawi.

FCSCA Minister hi MLA pahnih C Lalmuanpuia leh Lalrinsanga Ralte te, FCSCA secretary HL Rochungnunga leh director Dr Lalhriatzuali Ralte ten an ṭawiawm a ni.