MPSC Chairman hluite ngaihdan

Sorkar thil tih dan hi a dik lo hul hual. Chhuanlama an siam ‘MPSC an indaih lo’ tih hi a nuihzatthlâk. MPSC dintu an ni a, an hnathawktute pawh sorkar remtihna/phalna veka siam an ni. An indaih lo tak tak a nih chuan an mamawh ang ang pek belhtu tur an nih ang ngeia hna siam belhsak mai tur a ni. Politician thunun theiha hna lak reng reng a dik tak tak thei lo.

Tun hma kum 40 vel aṭang tawh khan Kerala khuan sorkar hna lak thil zawng zawng - group A aṭanga IV grade thlengin Kerala PSC kutah a dah vek a, eng sorkar mahin tihdanglam an tum ngai lo. Literacy-a Kerala dawttua inngai keini khawsak dan erawh chu, lehkhathiam tlem berna rama mite tih dan a ni. A zahthlak khawp mai. MPSC hi kum 20 chhunga ‘independent’ thei tura ngaih kha, ṭhan len lam pan ahnêkin naupang sawngnáwi ang maiin an ṭhan a tàwp a, chu mai ni loin, a 'reverse gear' in an kal a ni.

Group-B hi chu sorkar hian a chángin MPSC a pe a, a chángin a laksak a, a inthlak ve fo mai a. MPSC member ka nih lai khan group B hi kan khawih tel lo a, chairman ka nih erawh kha chuan kan vannei a, group B pawh kan khawih tel vek a ni. Group B khawih tel kha a rih chu a rit a, hna a tam a, a hahthlak hle.

MPSC aṭanga ka chhuah veleh sorkarin group B chu a chhuhsak a, MZP lamin an nawr avangin sorkarin a pe let leh ta a. Group B chungchang hi chu sorkar hian a tidanglam fo a, tunah pawh hian a duha a tidanglam leh ta a ni maiin ka hria. Tunah hian sorkarin board (MSSSB) din a tum niin ka hria a, a pawimawh ber chu 'MPSC ang hian a fair eng em?' tih hi a ni a; a fair a nih chuan a ṭha. A fair turah ngai ila, sorkarin ṭha a ti a, a din a nih chuan a ṭha ka ti mai e.

MPSC-in UDC, pri­mary zirtirtu leh nurse-te kan la vek hi a hautak khawp mai. State ṭhen­khata an neih Staff Selection Board neih ve a ṭhatna a awm. Mahse, kan state sum dinhmun enin, MPSC  staff indaih lohna pawh kan pek belh thei loh laia sum tam tak sèn belhna tur body hran din hi a fel lo. Sorkarin MSSSB din a tum hi felfai leh rang zawka hna lakna atan ni loin, an thunun theih tur body hran din tumna niin a hriat a, a tling leh ṭha berte kan la lo a nih chuan kan ram leh hnamin a tuar ang.

MSSSB din an tum hi MPSC anga Indian Constitution-in a hum­­halh autonomous body a ni dawn lo a, an duh hunah sorkarin an bân thei dawn a, hei hi a him lo. MPSC chairman leh member-te chu sorkarin a bàn thei lo a, bàn tur chuan Supreme Court-in inquiry a lak hnuah bàn tura a recommend chuan Parliament-ah an pharh ang a, President chauhin a bàn thei a ni. MPSC sum hman tur hi state assembly-in a pass kher a ngai lo a, MSSSB sum hman tur erawh chu state assembly-in a pass a ngai thung dawn a ni.

MPSC kut aṭanga group B non gazetted post recruitment laksak hi ṭha ka ti lo. A chhan chu - sorkarin MPSC ring tâwk takin a kutah a dah a, tuna MPSC kut aṭanga an lak chhuahsak hi a chhan a ṭha tâwk lo a, 'Chhâwk zângkhai nan' tih hi chhuanlam a tling lo. MPSC kuta hna pek tawh chhuhsak hian mipuiin sorkar an rin loh phah dawnin ka hria. MPSC hna pek leh chhuhsak hi sorkar thu a ni ngei mai a, mahse, sorkar tan tih theih apiang tih zel hi a dik chuang lo.