Myanmar ráltlân thawn kîr tum ṭhulh rih

Lawngtlai district-a Myanmar mi raltlan la chám bángte June 15, Inrinnia an rama thawn kîr tum chu chhan hrang hrang vangin ṭhulh rih a ni a, ruahmanna siamṭhat leh a ni dawn.

Lawngtlai aṭanga thu dawn danin, India leh Myanmar ramri, Lawngtlai chhimthlang lam, Laitlang leh Varâng dái velah kum 2017 tàwp lam aṭanga Myanmar sipai leh Arakan Army-te inkah avangin sahimna zawngin Myanmar khua leh tui (Zakhine hnam) eng emaw zat chu raltlanin, Hmawngbuchhuah leh a chhehvelah an inbengbel a; chu'ng mite chu sorkar chuan June 15, 2019-a an ram Myanmar-a thawn kîr turin ruahmanna a siam a ni.

Myanmar aṭanga sahimna zawnga India/Mizorama rawn tlân lut, tun thlenga la chambáng zat Assam Rifles leh Central YLA-te chhinchhiah a inang lo a; June 23, 2019 khan Lawngtlai DC, Central YLA, Mizoram police leh Assam Rifles-te'n a huhoin an chhiar nawn leh a; an chhinchhiah danin, in/chhungkua 54-ah raltlan mi 219 an awm mek. Buaina a thlen tirh lama Mizorama raltlana lut zinga a zatve vel chu Myanmar-ah an kîr leh tawh a ni.

Hetih lai hian, raltlan ṭhenkhat chuan Myan­mar-a lêt an châk tawh loh thu an sawi a, "Chhungkaw khawsakna tur leh dam khawchhuahna khawpa hna thawh tur a awm lo," an ti.