KHAWTHLIR

Aizawl South-II Area MUP chuan nimin khan Tuikhuahtlang YMA Hall-ah khawmpui an hmang a, an hun hmanpuitu Social Welfare minister Dr K Bei­chhua chuan upate chu Mizoram malsawmna hnar an nih thu hrilhin, "Upa in nih avangin ­chhungkaw tan ṭangkai loh tur. In tu leh fate tana in  ṭawngṭaina ringawt pawh suma lei sen rual loh a ni," a ti. Inkhawmah hian MUP Aizawl South-II area chhunga mipa upa ber Laihnuna (96) leh hmeichhe upa ber C Lal­chungnungi (90) hnenah thilpek hlan a ni.

ZPM member VL Zaithanzama zawhna chhangin Supply minister K Lalrinliana chuan ni 14.2.2020 thleng khan retailer 504 ten e-POS hmangin buhfai an sem tawh thu House a hrilh.

Joint Controller of Legal Metrology chuan thu-chhuah siamin, The Legal Metrology (Packaged Commodities) Rules, 2011-in a phût angin, Mizoram chhungah thil fûnnaa ziah lan ngei ngei ngai (mandatory declaration) awm lo (a bikin energy drink)-te zawrh khap a nih thu a tarlang. Hemi chungchanga thupek chu March 1, 2020-ah kalpui ṭan tur a ni.

ICAR-National Research Centre for Seed Spices (NRCSS), Extension Education & Rural development, Mizoram University (MZU) leh All Mizoram Farmers' Union (AMFU)-te ṭangkawp chuan nimin khan kuthnathawktute pual­in MZU-ah 'One Day Training Program on Advances in Seed Spice Production Technology' an buatsaih a, NRCSS senior sciencetist Dr Shiv Lal  leh sciencetist  Dr Narendra Chawdery-te'n an zirtir. Training-a tel mi 150 te hnenah hlo kahna leh ipte sem a ni.

February 26, Nilaini khan Siaha DC Bhupesh Chaudhary hoin a pisaah Siaha district-a SEDP Benificiary Selection Board member-te an 

ṭhukhawm a; Siahaa AH&Vety office chuan SEDP pilot project atan beneficiary 55 an thlan tawh thu an tarlang. AH&Vety-in SEDP dawng tur an thlan tawhte chu poultry (broi­ler vulh)-ah chhungkaw 15, poultry (rainbow rooster)-ah chhungkaw 20 leh vawk vulhah chhungkaw 20 a ni.