Mizoramah ILP nei 21,757 an awm mek Raltlan ni lo foreigner an awm kan hre lo - HM
Home minister Lalchamliana chuan Mizoramah Inner Line Permit (ILP) nung nei hnam dang mi 21,757 an awm mek thu Assembly House a hrilh a; Mizoram chhim lama Myanmar râltlante tih loh chu Mizoram chhungah foreigner an awm sorkarin a hre lo tih a sawi.
ZPM Legislature Party leader Lalduhoma zawhna chhangin Lalchamliana chuan, May 2017 leh May 2019 inkar chhung khan Goods and Services Tax (GST) hnuaiah kum hnih dam tur ILP mi 135 hnenah pek a nih thu leh, chungte chu Home department kaltlangin DC-te'n an pek chhuah thu a sawi a ni.
Home Minister chuan, "Sorkarin kumin January-May chhung hian ILP nei lo mi 1,893 manin a thawn let tawh a, tunah hian ILP nei lo hnam dang Mizoramah an awm hriat a ni lo," a ti a; ILP pek dan chu computerise tura hmalak mek a nih thu a sawi.
Lalduhoma chuan, Mizorama hnam dang awm zinga ILP nei leh nei lo vai chungchangah sorkar chu tlawmngai pawlte a ring mah maha a lan thu sawiin, "NGO-te nena thawhho hi a ṭha a, mahse, kan ring mah mah em? Sorkar mualphona a ni thei em, tihte ngaihtuah tel a ngai," a ti.
Minister Lalchamliana chuan, NGO-te nen ṭang rualin Mizorama hnam dangte'n ILP an neih leh neih loh endikna, periodical checking neih an tum thu sawiin, "Zing zawkin surprise checking tih kan tum," a ti a; ILP chu fimkhur zawka pek a ṭul thu leh a sponsor-tute'n an mawhphurhna an hriat loh fo avangin, hnam dang ILP sponsor chungchangah sponsor-tute'n an mawhphurhna leh tih turte an hriat chian leh zual a ngaih thu a sawi.
Mizoramah khualzin pangngai ni lo ram dang mi (foreigner) an awm leh awm loh zawhna dang chhangin Home Minister chuan, "Tuna kan hriat theih chu Myanmar aṭanga Mizoram chhim lama rawn raltlante hi an ni. Raltlante hi Central aṭangin thawn haw tura rawn tih a ni a, a ṭul chuan tharum pawh hmang mai turin min ti. Anmahni zat chhinchhiah dan a inang lo a, a ṭhenin 238 an tih laiin, a ṭhenin 228 an ti. Tunah sawn DC kaihhruainain identification tih mek a ni," a ti.
Lalchamliana chuan, MNF member H Lalzirliana zawhna chhangin, Rajiv Nagar-ah police station/outpost dah tumna a awm rih loh thu a sawi a; MNF member dang Lalrintluanga Sailo zawhna chhangin, Reiek BDO huam chhunga N. Kanghmun khuaah police outpost dah tum a nih thu a sawi bawk.
Nimina session-ah hian paper panga - The Mizoram Municipalities (Ward Committee and Local Council) (Third Amendment) Rules 2015, The Mizoram Municipalities (Facilities to Mayor, Deputy Mayor, Chairman, Vice Chairman, and Councillors) Rules 2018, The Mizoram Municipal Appellate Tribunal Rules 2017, The Mizoram Urban Areas (Land Development, Landslide Prevention and Mitigation) Rules 2017, The Mizoram Street Vendors (Protection of Livelihood and Regulation of Street Vending) Rules 2017 leh The Mizoram Real Estate (Regulation and Development) Rules 2019-te House Leader-in a pharh.
Assembly Public Accounts Committee (PAC) chairman Lalduhoma'n Health & Family Welfare department kaihhnawiha PAC 30th. Action Taken Report leh, Transport department kaihhnawiha PAC 31st. Action Taken Report-te a pharh a; Dr ZR Thiamsanga'n 20th, Report of the Subject Committee-III of the 7th. Legislative Assembly of Mizoram relating to HIV/AIDS under Health & Family Welfare Department a pharh bawk.