Politician ṭha tehna chu an rorel chhunga Ram tana an hnutchhiahah a ni - Bualhranga

ZPM Val Upa Council (VUC) member Bualhranga chuan, politician ṭha tehna chu thlan tlin an nih zat aiin, an rorel chhunga ram tana an thil hnutchhiahah a nih thu a sawi.

Bualhranga hian nimin khan ZPM pisaa inkhawmah thu sawiin, "Politician ṭha tehfung chu, 'Inthlanah vawi engzat nge an tlin' tih a ni lo a, 'An rorel chhungin eng hna ṭha nge an hnutchhiah' tih hi a ni. India rama state hmasawn chak - Punjab, Karnataka, Bihar leh Sikkim-te hi an ram hruaitute vanga hmasawn chak vek an ni," a ti.

Mizoramah Congress party-in kum 20 chuang leh MNF-in kum 10 chuang ro an rel mek thu sawiin Bualhranga chuan, "Ro an rêl chhungin Mizoram leh mipui tan ro tling hnutchhiah an neih si loh chuan, chumi hun chhunga chief minister nih leh minister nihte chu inchhuanna tur ni loin, zahthlak mai a ni," a ti a; chhui tlak loha sorkar siam ṭhinte chu an hun a tàwp rualin mipuiin ânchhia an lawh zui ṭhin thu a sawi.

VUC Member chuan, BJP-te'n Hindu lal ram siam tumin hneh taka ro an rel mek thu sawiin, "Mizoramah chuan BJP notê MNF-in ro an rêl mek. CAB leh Uniform Civil Code-te hi Mizo hnam leh Kristian sakhaw tan a pawizia hriain fimkhur takin kan thlir tur a ni. Kan hma lawkah hian kan hnam tih dan humhim tur leh, kan sakhaw humhim turin kan tualzawlah martar kan huam a ngai mai ang tih a rinawm," a ti a; Mizoram hma hun atan ramin a mamawh chu ZPM an nih thu a sawi.